New Testament

Ndimi Pita, ntumwa wa Jesu Khirisiti. Ku bahalugwa be Ndzimu banonga bataya bakaandama ntunhu wose we Ponto ne mu Galatiya ne mu Kapadokiya ne mu Ezhiya ne mu Bhitiniya,

bakahalugwa ngozibila mbeli kwe Ndzimu Tate, bakayengemadziwa ne Meya yakayengemala, kuwha Jesu Khirisiti kuti munyasiwe ne malopa awe: Ngoni ne kunyalala ngakuwande pakati kwenyu.

Ngakukudziwe Ndzimu kakale bali Tate ba He wedu Jesu Khirisiti! Ne ngoni dzabo whulu, takazwagwa butshwa mu kugalabgwe kunotjila, ne kumusiwa kwa Jesu Khirisiti mu bafi,

nekugala nhaka tjisingalobe, tjisina hambgwa, kakale tjisingafubale, tjamakabigigwa kudzimu,

imwi bavikiligwa ne masimba e Ndzimu, ne bugalimoyo kuyitila jidzo lakalindila zumbunugwa mu nsi we bupelo.

Hanhani muna ikoku, nenguba mu nsi uno mungadziyila kuhomanana ne ndiko dzakasiyana siyana,

kuti ndizo malebeswa e bugalimoyo gwenyu guna themba inopinda ye golide inoti nenguba iloba, koga inolikiwa ne moto, sa ikokobo bugalimoyo gwenyu gungabe mbhayilo mu kukudza ne kumilidzila pehhugwi ne kutetiwa mu kuzumbunugwa kwa Jesu Khirisiti.

Nenguba musakambona, muna ludo muunli, nenguba musingambone sangwenu mogalamoyo muunli, muhanha kunotjenamisa, kukulu kwazo.

Mohanha ngobe muamutjila mbuzilo ye bugalimoyo gwenyu, ilo jidzo lenyu.

Balebesambeli bakaleba nekwe ngoni dzakabe dzowobe dzenyu, bakahakisisa kakale bakabhuzwisisa nekwe jidzo ileli.

Bakabhuzwisisa kuti kowobe kwakatini kene nsi upi unotjenesiwa ne meya ya Khirisiti imubali, ha ilebesambeli nekwe kudziyidziwa kwa Khirisiti nenge kukudziwa kunowotobela.

Bakazumbunuligwa kuti bakabe basingazwithamile, koga bakabe bethamila imwi, mu zwinhu izwezwi zwamunobudziwa misi ino ndi ibabo bakasumikila ndebo mbuya kumuli ne Meya yakayengemala yakatumwa ibva kudzimu, ili izo zwinhu batumwa be kudzimu zwabagala behaka kubona.

Ndizo, lulwamisani njalakang'wa dzenyu kuhinga, muzwibhate. Kugalabgwe kwenyu ngakube mu ngoni dzinohha kumuli mu kuzumbunugwa kwa Jesu Khirisiti.

Se bana banowha, musitjayendidzane ne njemulo dzinobva mu kuhaya luzibo kwenyu kwa ntolo.

Koga, sa iye wakamudana ali n'yengemali, ibeni bayengemali namwibo, mutjimwe ne tjimwe tjamunothama;

sekwa kwakakwagwa, kuyi “Yengemalani, ne kuti imi ndakayengemala.”

Ha mudana muti Tate bedu, ibo banosumikilisa mmwe ne mmwe ne mihingo iye kuhhe kwe halaulo, mutjilile mu kuhla Ndzimu mu misi yose ye butaya gwenyu mu hango.

Moziba kuti makadzutunugwa mu mipanga isina shingo yamakadiyiwa ndi botate benyu. Amuzodzutunugwa ne zwithu zwinoloba se siliva ne golide,

koga makadzutunugwa ne malopa anodika kwazo a Khirisiti, sa iyawaye e pkhwizana isina bulema kene tjifo.

Wakagala abigigwa nhingo iwoyu hango isanhu ikabambiwa, koga kazumbunugwa mu bupelo gwe misi ne kwenyu.

Makagalamoyo mu Ndzimu ndiye, iwo wakammusa mu bafi ukampa gudzo, ndizo bugalimoyo ne kugalabgwe kwenyu zwimu Ndzimu.

Sekwa makatjenapadza meya dzenyu ne kuwha malebeswa, kuti ndizo mube ne ludo gwakalulwama mu makamu, danani ne malebeswa ne moyo yenyu yose.

Makazwagwa butshwa, kusi ne mbewu ye nyama inobola, koga ne mbewu isingabole, ilo dama linotjila kakale ligelile tjose le Ndzimu.

Ngoti kwakakwagwa kuyi, “Banhu bose banonga buwha, nenge bubuya gwabo gonga luba le hango. Buwha goswabiswa ne hhuba, ngono luba likawa,

koga dama la He ligele ne kusingapele tjose.” Dama ilelo i ndebo mbuya yamakasumikiligwa.