New Testament

Mu lukwalo gwangu gwe kutanga, Teofilo, ndakakwala nekwe zwinhu zose Jesu zwaakatangisa thama kakale kazwidiya,

kuswikila hhuba laakatolegwa pehhugwi kudzimu, asinopa batumwa baakabe ahalula ndayo ne Meya Yakayenemala.

Hule kwe dziyila kukwe wakazwilakidza ku balume ibabo ne butendeki bunjinji gwe kuti unotjila. Wakabazwilakidza mu lubaka mahhuba ali makumi manna, ngono kalebeleka nabo nekwe buhe gwe Ndzimu.

Ngono wakati anabo, kababva kati basibhude mu Jerusalema, koga balindile tjabakagadziwabgwe ndi Tate, sekwa akaleba eti, “Makawha ndimi,

ngoti Johani wakabe ebvubika ne vula, koga mu mahhuba mahomanana anohha imwi mowobvubikwa ne Meya Yakayenemala.”

Ndizo batumwa bakati bakubungana, bakabhuzwa Jesu bakati, “He, apa mowobgwiliza buhe mu Iziraeli mu lubaka igogu kene?”

Jesu kati kubali, “Akute kuli kwenyu ziba misi ne lubaka gwakabigwa ndi Tate ne simba labo.

Koga moamutjila simba ha Meya Yakayenemala ihha mumuli, ngono mowobe batendeki bangu mu Jerusalema ne mu Judiya yose ne Samariya ne ku phelelo dze hango.”

Hule kwe leba ikoku, wakatolegwa pehhugwi kudzimu bakanlinga, ngono gole likan'dusa mu meho abo.

Bakati batjakalingisisa pehhugwi ha iye eyenda, tjinyolotjo balume babili bakambala butjena bakama pabali

bakabe beti, “Balume be Galili mumilileni ipapo makalinga pehhugwi? Jesu iwoyu, watogwa mumuli eyisiwa kudzimu, unowobuya ne zila iyo zwayo yamabona eyenda ku Ndzimu ndiyo.”

Ipapo batumwa bakabgwilila ku Jerusalema bebva ku Dombo le Mitoba, lipedlo ne Jerusalema kungabe gwendo gwe Sabatha

Bakaswika bakatanhila pehhugwi ku ng'umba yabakabe begala. Kwakabe kuli Pita, na Johani, na Jakubo na Enduru, na Filipo na Tomasi, na Bhatolomeo na Matewu, na Jakubo nkololo wa Alifeo, na Simoni Nzeloti na Judasi nkololo wa Jakubo.

Bose ibaba bakazwimisila tembezela bali moyo nng'ompela, kose ne bakadzi babakabe banabo na Mariya mme ba Jesu ne banung'una babe.

Mu mahhuba iyawo Pita kamilika kama pakati kwe bagalimoyo (bakabe bali mbunga unolizana zana lina bali makumi mabili (120)

kabe eti, “Makamu angu, matama e whalo dze Ndzimu akalebgwa ne Meya Yakayenemala ne nlomo wa Dafite nekwa Judasi iye wakabe ali ntungamili wa ibabo bakasunga Jesu akafanila hingikala.

Judasi wakabe ali mmwe wedu, ngobe wakabe ahalugwa kube ne gobe mu n’hingo iwoyu.

Ngono ngwenu Judasi wakatenga hango ne mari ya akawana ne n’hingo uwe wakayipa, iko kwaakawila ne n’holo mu fa kukwe kaphutukana mabula awe wose kabhudila pahhe.

Banhu bose banogala mu Jerusalema bakawha ne kwako, ndizo ne lulimi gwabo bakadana hango iyeyo Akelidama, kunobva kuti, ‘Hango ye Malopa.’

“Ngobe kwakakwagwa mu lukwalo gwe Njimbo kuyi, ‘Ng'umba iye ngaibe dongo; kuhaye ne unogala muili.’ Kwakakwagwa kakale kuyi, ‘Mmwe ngaatole mamo awe mu n’hingo.’

“Ndizo kuhakika kuhalula mmwe we balume bakabe banaswi mu lubaka gose He Jesu betjila naswi,

kubva mu lubaka gwebvubika kwa Johani kuswikila hhuba Jesu laakatolegwa pehhugwi kudzimu ebva mutili, iwoyo wakafanila abe mmwe wedu ali ntendeki we kumuka kwa He Jesu.”

Ndizo bakahalula balume babili, Josefa iye wakabe edang'wa Bhasabhasi, kakale edang'wa Jusito, na Matiyasi.

Ipapo bakatembezela beti, “He, imwi moziba moyo we mmwe ne mmwe, ndizo mutilakidze kuti ndi upi wa ibaba babili wamahalula

kutola n’hingo iwoyu we butumwa wakasiyiwa ndi Judasi eyenda kwaakafanila.”

Ipapo bakakandila kubona n’halugwa pakati kwe balume ibabo babili, ngono kukawila Matiyasi, ndizo kapamha bali gumi lina nng'ompela.