New Testament

Kwakabe kuna mmwe nlume mu Sizariya edang'wa Khoneliyasi, wakabe ali nlauli we babhayani be Baroma bali zana mu gupo lakabe lidang'wa “Gupo le Italiya.”

Wakabe ali nlume unohla Ndzimu ne lebeswa iye ne n’ha uwe wose, wakabe epa bahayi zwipo akasununguka etembezela Ndzimu misi yose.

Kabona mbono limwe hhuba mu matewuko ne lubaka gwe butatu, muili wakabona zubuyanana ntumwa we kudzimu engina kuunli eti, “Khoneliyasi!”

Kalingisisa ntumwa ngohla, ngono kati, “Ini He?” Ntumwa kadabila eti, “Ndzimu unohanhisiwa ne mitembezelo iyo nene mihingo iyo ye pa bahayi ngono unokudabila.

Ndizo ngwenu tuma balume ku Jopa kunodana nlume unodang'wa Simoni Pita.

Unogala mu ng'umba ye nsuki we makukuta unoyi Simoni we nzi upedlo ne gungwa.”

Ntumwa we kudzimu wakalebeleka naye kati atjiyenda, Khoneliyasi kadana babili be balanda babe ne mbhayani wakazwipa kubva muna ibabo bakabe ben’hinga.

Ndizo kati ababudza tjimwe ne tjimwe tjahingikala, kabatuma ku Jopa.

Tjimuka bakati bali mu zila yabo babepedlo ne Jopa, Pita katanhila pehhugwi kwe ng'umba ne lubaka gwe masikati kunotembezela.

Kabhakwha ne hhala, ngono kayemula dla, koga zodliwa zwakati zwitjalulwamisiwa, kabona mbono.

Kabona kudzimu kwakahhuka, ngono tjimwe tjideluka tjilingika se jila gulu gulu lidelusigwa pasi ne midzibo yalo minna.

Mulili kwakabe kuna njudzi dzose dze mhuka ne zwinosoba pasi ne nyunyi dzinowuluka.

Whi likati kuunli, “Milika, Pita, ubhaye udle!”

Koga Pita kati, “He, ne malebeswa andingake! Andinhu adla tjimwe tjakatemapala kene tjisi tjibuyanana.”

Whi likalebeleka naye kakale gwe bubili liti, “Ndzimu tjawakatjenapadza usitjidane tjisi tjibuyanana.”

Ikoku kwakahingikala katatu, ngono ipapo jila ilelo likabe libgwilila pehhugwi.

Pita kati atjakaabadziwa ne kuti mbono yaabona ingabe ibvani, bonani balume bakabe batumwa ndi Koneliyasi bakati babhuzwa kuti ng'umba ya Simoni iponi bakabe babe mile pa nkoba.

Bakapindisa bakabhuzwa kuti kene, “Simoni unodang'wa Pita unogala ipapo?”

Pita kati atjakumbula nekwe mbono, Meya ikati, “Kuna balume batatu banokuhaka.

Ndizo milika udeluke, ngono usizeyeze yenda nabo, ngobe ndabatuma.”

Ndizo Pita kadeluka kati ku balume ibabo, “Ndimi wamunohaka ini tjamuhhisa pano.”

Bakadabila beti, “Nlauli we babhayani bali zana, Khoneliyasi, watituma. Nlume waka lulwama unonamata Ndzimu unotetiwa kwazo ne Bajuta bose. Ntumwa we kudzimu wakayenemala wakambudza kuti akukokele ku ng'umba iye, kuti ndizo awhe tjaunoleba.”

Pita kadanila balume ibabo mu ng'umba bakabe bezi babe. Tjimuka kamilika kayenda nabo; ngono amwe aamu mu Jopa akayenda naye.

Tjimuka bakaswika mu Sizariya, kwaakabe akalindigwa ndi Khoneliyasi ne makamu ne bazwalani baanoda baakabe akoka.

Pita kati engina Khoneliyasi kan’hangamidza, kawila pa makumbo awe ennamata.

Koga Pita kammilidza. Kati kuunli, “Milika, namibo ndi nhu koga.”

Pita kayendilambeli elebeleka na Khoneliyasi, ngono kangina mu ng'umba kwaakawana banhu banjinji bakakubungana.

Kati kubali, “Imwi ne kwenyu moziba kuti ate kuli mu nlayo kuti Njuta ahangahangane, kene akumbe mmwe we tjaba tjipoga. Koga Ndzimu wakandilakidza kuti ndisitole mmwe nhu se wakatemapala kene se usi mbuyanana.

Ndizo wakati unditumila banhu iwe Khoneliyasi, ahha ndikasilambe. Ndizo ngwenu ndobhuzwa tjawandidanila.”

Khoneliyasi kati, “Kwakabe kuli ne lubaka igogu mahhuba matatu akapinda, ndikabetembezela mu ng'umba yangu mu lubaka gwe awara ye butatu mu matewuko. Tjinyolotjo nlume wakaambala zwiambalo zwinopenya kama mbeli kwangu.

Ngono kati, ‘Khoneliyasi, Ndzimu wawha ntembezelo uwo, ne zwipo zwizo ku bahayi wazwikumbula.

Tuma nhu ku Jopa, ku nlume unodang'wa Simoni Pita. Ugele mu nzi wa Simoni, nsuki we makukuta, unogala pedlo ne gungwa!’

Abe ndokutumila banhu tjinyolotjo, ngono wathama bunhu ukahha. Ngwenu tipano tose mbeli kwe Ndzimu, takalindila wha tjimwe ne tjimwe He tjabakubva kuti utjilebe.”

Pita kahhula nlomo kati, “Ngwenu ndowotjiwhisisa kuti malebeswa Ndzimu autohalaula.

Koga mu njudzi dzose, mmwe ne mmwe unohla Ndzimu ethama tjakalulwama, Ndzimu unon'amutjila.

Unoziba dama Ndzimu lawakatumila ku Iziraeli, whusumikila Ndebo Mbuya ye kunyalala ndi Jesu Khirisiti, iye ndi He wa bose.

Ndilo dama lakasumikigwa mu hango yose ye Judiya, kutangisa mu Galili hule kwe bvubikwa kwakadiyiwa ndi Johani;

Ndzimu sekwa wakahalula Jesu we Nazareta ne Meya Yakayenemala nene simba; sekwa akayenda kumwe ne kumwe ehinga ndulamo, epodza bose bakabe bakatshambilidziwa ne Nvanganyi, ngobe Ndzimu wakabe unaye.

Iswi ti batendeki be tjimwe ne tjimwe tjaakathama mu hango ye Bajuta ne mu Jerusalema. Bakambulaya ne kunlembeledza mu nti.

Koga Ndzimu wakammusa mu bafi ne hhuba le butatu, ngono ukathama kuti aboneke,

kusi ku banhu bose, koga kutili iswi takahalugwa ne Ndzimu tili batendeki, iswi bakadla naye tikang'wa naye hule kwe amuka mu bafi.

Ngono wakatilaya kuti tisumikile Ndebo Mbuya ku banhu ne kuti titendeke kuti ndiye wakabigwa ne Ndzimu kube nsumikilisi we batjili ne bafi.

Balebesambeli bose banopa butendeki kuti, mmwe ne mmwe unogalamoyo muna Jesu unowozwiibhatigwa zwibi zwizwe ne simba le zina lile.”

Pita kati atjaleba ikoku, Meya Yakayenemala ikadelukila pehhugwi kwa bose baka bewha dama.

Bagalimoyo bakathumbigwa bakabe bahha na Pita bebva ku Jopa bakatjenamila kuti Ndzimu wadila tjipo tjawo tje Meya Yakayenemala muna Bezwitjaba,

ngobe bakabawha belebeleka ne ndimi dzipoga be kudza Ndzimu. Pita kalebeleka kati,

“Ibaba banhu baamutjila Meya Yakayenemala, koga saswi. Apa uyapo kene ungadzibila kuti babvubikwe ne vula?”

Ndizo kalaya kuti babvubikiwe ne zina la Jesu Khirisiti. Ipapo bakankumbila kuti atongo gala nabo mahhuba mahomanana.