New Testament

Kwakati hhuba le Phentekhosite lahha, bose bakabe bakakubungana panhu pang'ompela.

Tjinyolotjo, nsindo unonga whuwhudza kwe mhepo ina masimba ukahha ubva kudzimu, ukahhala ng'umba yose yabakabe bali muili.

Bakabona kunofanana ne ndimi dzinonga mpfuto we moto dzakapalalana, ngono dzikahha dzikagala pehhugwi kwe mmwe ne mmwe wabo.

Bose bakahhala Meya Yakayenemala, ngono bakatangisa lebeleka ne ndimi dzipoga sekwa bakapiwa ne Meya.

Mu Jerusalema kwakabe kugala Bajuta, balume banohla Ndzimu, banobva mu njudzi dzose dze hango.

Bakati bewha nsindo iwoyu, mbunga nkulu ukakubungana ne gaabadzo, ngobe mmwe ne mmwe wabo wakabawha belebeleka ne lulimi gugwe.

Ngono bakakaabala kwazo, bakabhuzwa beti, “Apa banhu bose ibaba banolebeleka ate Bagalili kene?

Ini ngono mmwe ne mmwe wedu ewha mmwe ne mmwe wabo elebeleka ne lulimi gugwe?

Iswi tobva ku Phatiya ne ku Mediya ne ku Elamu ne ku Mesopotamiya ne ku Judiya ne ku Kapadokiya ne ku Ponto ne ku Ezhiya

ne ku Firigiya ne ku Phamufiliya ne ku Egipiti ne mitunhu imu Libhiya pedlo ne Sirene, ne bezi banobva ku Roma,

Bajuta kose ne bakabe behanduligwa mu bugalimoyo gwe Tjijuta ne ku Kirete ne ku Arabhiya tobawha beleba makaabadzo e Ndzimu ne ndimi dzedu!”

Bakakaabala basingawhisise, ngono bakabhuzwana beti, “Ikoku kobvani?”

Koga bamwe bakabadadila beti, “Bakalaladza.”

Koga Pita kamilika ne bali gumi lina nng'ompela, kamilidza whi lile, ngono kalebeleka ne mbunga eti, “Banhu be Judiya, namwi mose bamu Jerusalema, imani ndimutjenesele ikoku; whililani ne njele tjandinoleba.

Banhu ibaba abazolaladza sekwa munokumbula. Kutji lubaka gwe hhanalume mangwanana.

Koga etji nditjo tjakalebgwa ne nlebesambeli Jowele eti,

‘Ndzimu ukati: Kowoti mu mahhuba e bupelo ndowodila Meya yangu mu banhu bose. Bakololo ne bakololokadzi benyu banowolebela mbeli bahhuhha benyu banowobona mbono ne banhuntana benyu banowowolota.

Kose ne mu balandalume bangu ne mu balandakadzi bangu ndowodila Meya yangu mu mahhuba iyawo, ngono banowolebela mbeli.

Ngono ndowothama matjenamiso pehhugwi kudzimu ne zwilakidzo mu hango, pasi, kowobe ne malopa ne moto nene bhulubusi.

Hhuba lowotemapala kukabe hhalima ngono mwedzi ukahandugwa ukahabapala se malopa mbeli kwe hha kwe hhuba gulu la He.

Ngono kowohingikala kuti iye unodana zina la He mu lubaka igogo atjidziwe.’

“Banhu be Iziraeli, whililani whoku, Jesu we Nazareta nhu wamakalakidziwa ne Ndzimu ne matjenamiso, makaabadzo nene zwilakidzo, Ndzimu zwawakathama pakati kwenyu ndiye, sekwa munoziba imwi.

Jesu iwoyu makampiwa ne ndongoloso yakabigwa ye Ndzimu nene ziba zwimbeli kwawo; koga imwi makahingisa banhu babi kumbulaya ne kumbambula.

Koga Ndzimu wakammusa; unsunungula mu zogwadza zwe lufu, ngobe kwakabe kusingatubuke kuti lufu gumbhatile tjose.

Dafite wakati ne kukwe, ‘Ndobona He misi yose mbeli kwangu. Se bali ku luboko gwangu gwe ludli, akuna tjingandizunguza.

Ndizo moyo wangu unohanha ne lulimi gwangu gohanha ne mbili wangubo unowotjilila mu kugalabgwe,

ngobe amutowondisiya mu kumbu naiko amungaletjedzele N'yenemali wenyu kubola.

Makandilakidza zila ye butjilo, mowondihanhisa ne kubepo kwenyu!’

“Makamu, ndomubudza ne malebeswa kuti batategulu Dafite bakafa bakabiganyiwa, ngono kumbu tjabo tjiyapo na nasi.

Bakabe bali nlebesambeli ngono bakaziba kuti Ndzimu wakabagadzabgwe ne tuna kuti unowobiga mmwe we bana babo mu tjigalo tjabo tje buhe.

Bakabona zwimbeli ndizo bakaleba nekwe kumuka kwe Mesiya kuti, ‘Aazosiyiwa mu kumbu ne mbili uwe auzobola.’

Ndzimu wakamusa Jesu iwoyu, ngono iswi tose ti batendeki bekuti ikoku kwakatikala.

Watjimilidzigwa ku luboko gwe ludli gwe Ndzimu, kaamutjila Meya Yakayenemala se gadzabgwe kwa Tate, ndizo watebulila mutili itjetji tjamunobona ne tjamunowha.

Ngobe Dafite aazotanhila kudzimu, koga iye kati, ‘He bakati kuna He wangu: Gala ku luboko gwangu gwe ludli

kudzina ndithama zwita zwizo tjigalo tje makumbo awo.’

“Ndizo bose be ng'umba ye Iziraeli ngabazibe ne malebeswa kuti Ndzimu wakathama Jesu iwoyu wamakabambula kube He ne kube Mesiya!”

Kukati banhu bewha ikoku, bakadziyidzika, ngono bakati kuna Pita ne batumwa bamwe, “Makamu, tihineni ngono?”

Pita kahandula eti, “Handukilani matjinyo enyu mubvubikiwe, mmwe ne mmwe wenyu ne zina la Jesu Khirisiti kuti ndizo matjinyo enyu muazwiibhatigwe. Ngono mowoamutjila tjipo tje Meya Yakayenemala.

Kugadziwabgwe ne kwenyu ne bana benyu na bose bakule kule, mmwe ne mmwe He Ndzimu wedu waunowodana.”

Ngono katendeka ne matama amwe manjinji kabakulumbidza eti, “Muzwitjidze mu tjizekugwana itjetji tjakayipa.”

Ibabo bakaamutjila ndebo iye bakabvubikiwa, ngono ilelo hhuba bakapamhidziwa ne banhu bali zwiwulu zwitatu (3,000).

Bakamusila meya zwidiyo zwe batumwa ba Jesu nene kuhangana ne pemula tjiwunga nene mitembezelo.

Mmwe ne mmwe kahhigwa ngohla, ngono makaabadzo manji ne zwilakidzo zwinotjenamisa zwinji zwakathamiwa ne batumwa ba Jesu.

Bagalimoyo bose bakabe bali tjinhu tjing'ompela, bakahanganyila tjimwe ne tjimwe.

Bakatenesa zwinhu zwabo, kose ne thundu dzabo, ngono bakapa mmwe ne mmwe kuyendidzana ne haya kukwe.

Bakayendilambeli mahhuba wose behangana mu Ng'umba ye Ndzimu. Bakabe bepemula tjiwunga mu mizi yabo bedla bose ne mimoyo yakahanha, mimoyo mitjena,

bekudza Ndzimu kakale beamutjigwa zubuyanana ne banhu bose. Ngono He bakapamha hhuba ne hhuba ibabo bakabe betjidziwa.