New Testament

“Makamu na botate, mundiwhilile andizwimila ngwenu mbeli kwenyu!”

Bakati bewha elebeleka nabo ne Tjihebheru bakanyalala kwazo; ngono Paulo kayendilambeli kati:

“Imi ndi Njuta ndakazwaligwa mu Thasasi mu Silisiya, koga alegwa mu nzi iwowuno ndili pasi kwa Gamaliyele. Ndakaamutjila ndayo yakasima mu nlayo wa bobatategulu bedu ngono ndakabe ndakatukutilila Ndzimu samwi mose nasi.

Ndakadziyidza kunoti mu lufu, banhu bakabe betobela zila iyeyi. Ndakabhata balume ne bakadzi ha balahila mu ng'umba ye busungwa.

Ntungamili we Baphirisiti ne Gulukota lose bangatendeka kuti ndoleba malebeswa. Ndakaamutjila mubali whalo dzakwaligwa makamu mu Damasiko, ndizo ayenda ikoko kunobhata banhu ibaba ne kubahhisa ngeno ku Jerusalema bakasungwa kuti balobgwe.

“Ndakati nditjayenda ndiabilila Damasiko, kungabe pakati kwe masikati tjinyolotjo tjedza tjikulu tjibva kudzimu tjakandipoteleka.

Ndakawila pasi, ngono awha whi liti kundili, ‘Saulo, Saulo! Apa unondidziyidzilani kene?’

Adabila ndibhuzwa nditi, ‘Ndimwi ani He?’ Iye kadabila eti kundili, ‘Ndimi Jesu we Nazareta, iye waunodziyidza.’

Balume bakabe banami bakabona tjedza, koga abazowha whi lakabe lilebeleka nami.

Abhuzwa ati, ‘Ndihingeni ngono He?’ Ngono He kati kundili, ‘Milika ungine mu Damasiko, ngono ikweno unowobudziwa tjimwe ne tjimwe tjawakahaluligwa kutjihinga!’

Ndakabe bhofu nekwe tjedza tjinopenya, ndizo bandakabe ndinabo bakandikweba ne luboko bakanditungamilila mu Damasiko.

“Mu nzi iwoyo kwakabe kuna nlume edang'wa kuyi Ananiyasi, nlume wakabe enamata kunoyendidzana ne nlayo, etetiwa kwazo ne Bajuta bose bakabe begala ikoko.

Kahha kundili, kama pandili, ngono kati, ‘Gamu Saulo, pofunuka!’ Ne lubaka igogo apofunuka, ngono ambona.

Kati, ‘Ndzimu wa bobatategulu bedu wakuhalulila ziba kuda kwawo, kubona Nlulwami ne kuwha whi linobva mu nlomo uwe.

Ngobe unowobe ntendeki ku banhu bose nekwe tjawakabona nene tjawakawha.

Ndizo ngwenu, utjigelileni? Milika, ubvubikiwe ungule jinyo lilo udana zina lile.’

“Ndakahha ku Jerusalema, ngono ati nditjatembezela mu Ng'umba ye Ndzimu, abe ne mbono,

yandakabona He muili beti kundili, ‘Libilidza ubhude mu Jerusalema tjinyolotjo, ngobe banhu muno abatowoamutjila butendeki gugo ne kwangu.’

Adabila nditi, ‘He, banhu banoziba zubuyanana kuti ndakayenda ku ng'umba dze mitembezelo kulonga mu ng'umba ye busungwa ne loba ibabo bakabe begalamoyo mumuli.

Kwakati lopa le ntendeki wenyu Sitifani litebugwa, imi ndakabe ndili ipapo ndibvumana ne bulawa kukwe ndakalinda zwiambalo zwe babulayi babe.’

He bakati kundili, ‘Yenda, ngobe ndowokutuma kule kule kuna Bezwitjaba.’”

Banhu bakawhilila Paulo kudzina eleba ikoku, koga ipapo bakatangisa mimilila pehhugwi beti, “Dusani nhu wakajali mu hango! Mumbulaye! Aazofanilo tjila!”

Bakabe bemimila belahanya zwiambalo zwabo, bepukula whuluba.

Nkulu we babhayani kalaya kuti Paulo ayisiwe mu ng'umba ye babhayani, kababva kati banlobe ne rwabha kuti babone kuti ini Bajuta bemmimila sa ikoku.

Koga bakati bansunga kuti banlobe Paulo kati ku nlauli we babhayani bali zana wakabe ali mile ipapo, “Apa ku mu nlayo kuti ulobe n'gali we Roma asatongo sumikilisigwa mmwe nlandu kene?”

Nlauli we babhayani kati ewha ikoku, kayenda ku Nkulu we babhayani, ngono kambhuzwa kati, “Mohaka thamani kene? Nlume iwoyu N’roma!”

Ndizo Nkulu we babhayani kayenda kuna Paulo kambhuzwa eti, “Undibudze, apa un'gali we Roma kene?” Paulo kadabila eti, “Ee.”

Nkulu we babhayani kati, “Ndakabe N’roma ngolipa themba whulu ye mari.” Paulo kahandula eti, “Koga imi ndakazwagwa ndili N’roma.”

Tjinyolotjo balume bakabe bewombhuzwa bakabgwilila hule bebva panli; Nkulu we babhayani kapalukamoyo asinoziba kuti Paulo N’roma nenge kuti wansunga ne dziketani.

Nkulu we babhayani kada ziba malebeswa kuti Bajuta bakabe bebona Paulo nlandu weni; ndizo tjimuka kasunungula Paulo kalaya Baphirisiti bakulu ne Gulukota lose kuti bahangane. Ipapo katola Paulo kammisa mbeli kwabo.