New Testament

Ndimi Paulo ntumwa wa Khirisiti Jesu ne kuda kwe Ndzimu. Ndina Timoti gamu ledu.

Ku bayengemali, ibo makamu anogalamoyo muna Khirisiti, amu nzi we Kolosi. Ngoni ne kunyalala kunobva ku Ndzimu Tate bedu ngazwibe namwi.

Misi yose ha timutembezelela, toboka Ndzimu ibo Tate ba He wedu Jesu Khirisiti,

ngobe takawha nekwe kugalamoyo kwenyu muna Khirisiti Jesu nenge ludo gwamunago mu bayengemali bose.

Oku koikhwa ne kugalabgwe kwamakabigigwa kudzimu. Makawha kale nekwe kugalabgwe ikoku mu dama le malebeswa, iyo ndebo mbuya,

yakahha mu hango yose, inozwala zwizwalo kakale ikula sekwa yakayita pakati kwenyu kubvila hhuba lamakaiwha mukawhisisa ngoni dze Ndzimu mu malebeswa.

Sekwa makawha na Epafurasi, nlanda naswi unodika, unohingila Khirisiti ne malebeswa mu bumo gwedu.

Wakatibudza nekwe ludo gwamakapiwa ne Meya.

Nekwa ikoku, kubva tjose mu hhuba latakawha ne kwako, atizotongo letja kumutembezelela ne kukumbila Ndzimu kuti umuhhadze ne luzibo gwe kuda kwawo mu butjenjebvu gose ne kuwhisisa kunohhisiwa ne Meya yawo,

kuti ndizo mutjile butjilo gwakalulwamila He, gunon’hanhisa ne buhhalo, makayendilambeli ne mihingo yenyu yakalulwama inozwala zwizwalo nenge sekwa luzibo gwenyu nekwe Ndzimu gupamhidzika.

Dzene mungasimisiwa ne kusima kose kunobva mu simba lawo gulu. Kuti ndizo mutubule kube ne kusimidzila kukulu ne moyonlefu, nekuhanha,

nekuboka Tate, ibo bakatithama kuti tibe ne fanilo dzekube ne gobe mu nhaka ye bayengemali mu buhe gwe tjedza.

Wakatidusa mu simba le hhalima ukatiyisa ku buhe gwe Nkololo wawo unodika,

iye watinowana kudzutunungwa ne mazwiibhatigo e zwibi.

Khirisiti tjifano tje Ndzimu usingaboneke, ndiye mbano ye lubumbo gose.

Zwinhu zose zwakabumbigwa munli, zwinhu zwi kudzimu ne zwimu hango, zwinoboneka ne zwisingaboneke, zwigalo zwe buhe kene mibuso kene babusi kene balauli. Ndzimu wakathama zwinhu zose ndiye uzwithamila iye.

Wakabe yapo zwinhu zose zwisanhu zwikabe yapo, muunli tjimwe ne tjimwe tjimu magalo atjo.

Ndiye n’holo we mbili, ilo gubungano. Ndiye kutangisa, kakale ndiye we kutanga emusiwa mu bafi, kuti ndizo abe pehhugwi mu tjimwe ne tjimwe.

Kwakahanhisa Ndzimu kuti mbumbiko yawo yose igale muunli.

Ndzimu wakagadzanya zwinhu zose nawo ndiye, mu hango ne kudzimu, uthama mbakiso ne malopa e tjileyano tjitje.

Ngono imwi makatongobe makathubukana ne Ndzimu, muli zwita zwawo mu mikumbulo yenyu muhinga zwa zwakayipa,

koga ngwenu, ne lufu gwe nkololo wawo Ndzimu wakamugadzanya, kuti ndizo umubone mbeli kwawo makayengemala musina nlandu kakale musinga soleke.

Kobva koga mu kuti moyendilambeli mu kugalamoyo, makagadzikana makasimidzila musingatsheduke mu kugalabgwe mu ndebo mbuya yamakawha yakasumikiligwa itjili tjimwe ne tjimwe tjimu hango, iyo imi Paulo yandakabe n’hingi wayo.

Ngwenu, ndohanha mu kuwhisiwa zogwadza kwangu ne kwenyu, ngono mu nyama yangu ndopeleledza tjakasala mu kuwhisiwa zogwadza kwe mbili wa Khirisiti, ilo gubungano.

Ndakabe n’hingi we gubungano ne n’hingo wandakapiwa ne kwenyu, kuti dama le Ndzimu lizibgwe ne buhhalo,

lili masazibgwe akasumbikala makole manjinji mu zwizekugwana zwinjinji, koga ngwenu akazibisiwa bayengemali bawo.

Kubali Ndzimu wakahalula kuti bazibe kuti bukulu gwe fumwa ye gudzo le masazibgwe iyawa gungapani mu njudzi dzose, masazibgwe iyawa ndikuti Khirisiti unogala mumuli, iye kugalabgwe kwe gudzo.

Ndizo Khirisiti ndiye watinosumikila, titjemela kakale tidiya mmwe ne mmwe butjenjebvu gose, kuti ndizo tihhise mmwe ne mmwe akapelela muna Khirisiti.

Kuti ikoku kutubuke, ndohinga ndigwisa ne simba la Khirisiti linondisimisa lihinga lili mundili.