New Testament

Kugalamoyo whube ne malebeswa mu zwinhu zwatinogalabgwe mu zwili.

Ngobe banhu ba ntolo bakahanhisa Ndzimu ne kugalamoyo.

Ne kugalamoyo towhisisa kuti hango yakathamiwa ne dama le Ndzimu, kobva kuti zwatinobona zwakathamiwa ne zwinhu zwisingaboneke.

Ne kugalamoyo Abele wakapa Ndzimu tjibhayilo tjibuya pana tja Kaini. Nekwa ikoko kaamutjigwa ali nlulwami, Ndzimu uli ntendeki ngoamutjila zwipo zwizwe. Abele wakafa koga ne kugalamoyo kukwe utjalebelekazwe.

Ne kugalamoyo Enoki wakatolegwa kudzimu kuti asife. Aazobvapo kabong'wa, ngobe Ndzimu wakabe wantola. Koga wakati asanhu katogwa, kwakabe ne butendeki gwe kuti wakahanhisa Ndzimu.

Ausina kugalamoyo akutotubuka hanhisa Ndzimu ngobe kene ali ani unozwisedzedza ku Ndzimu wakafanila kuti abe ebvuma kuti Ndzimu uyapo, kakale nenge kuti unopa mbhayilo ibabo banouhaka.

Ne kugalamoyo Nowa wakati atjenjedziwa ne Ndzimu nekwe zwinohha koga zwisanhu zwikaboneka kayela njele, ndiko kabaka ng'umba inoangama mu vula se n'goro kutjidza be n’ha uwe. Ne kujalo kalakidza kuti hango ina nlandu, ngono kabe n'galinhaka we ndulamo inohha ne kugalamoyo.

Ne kugalamoyo Abhurahama wakati abviwa kuyi afuluke mu hango ya kanyi kukwe ayende ku hango yaakabe ewopiwa kateedza kayenda nenguba akabe asingazibe kwaanoyenda.

Ne kugalamoyo wakagala mu hango yaakagadziwabgwe se n’hhi umu hango isi iye ana Isaki na Jakubo bagalinhaka be kugadziwabgwe naye.

Ngoti wakabe akalindila nzi nkulu una pfiwa, wakabambiwa ukabakwa ne Ndzimu.

Ne kugalamoyo Sara wakati aamutjila simba le kuzwisenga, nenguba akabe akwegula wakagalabgwe kuti iye wakan'gadzabgwe unogalikamoyo.

Nenguba nlume iwoyu akabe atjifanana ne nhu wakafa, kwakabhuda munli njudzi njinji se nyenyedzi dzehhuhhugwi, njinji se nsetje umu mhili ye gungwa usingake ukabagwa.

Ibaba bose bakafa begalamoyo, basanhu bakaamutjila tjabakagadziwabgwe, koga bakati batjibona bakatjiamutjila tjili kule. Kakale bakaamutjila kuti bataya ne bahhi mu hango iyeyi.

Ngobe banhu banolebeleka sa ikoku banolakidza nelebeswa kuti banohaka yabo hango.

Ha bakabe bakumbula hango yabakasiya banobe bakawana tjibaka tje bgwilila.

Koga sekwakuli iko banohaka hango inoyita, ili hango i kudzimu. Ndizo Ndzimu autobabhatigwa ne shoni kudang'wa Ndzimu wabo, ngobe wakabalulwamisila nzi nkulu.

Ne kugalamoyo Abhurahama wakati elikiwa ne Ndzimu, kadusa Isaki kube tjibhayilo. Iye wakabe awana tjaakabe agadziwabgwe ne Ndzimu, wakabe akazwimisila kuun’dusila nkololo uwe wakabe ali iye ega,

iye ne kukwe wakabe abviwa ne Ndzimu uti, “Njudzi dzandinokugadzabgwe ne kwadzo dzowobva muna Isaki.”

Abhurahama wakabe egalamoyo kuti Ndzimu ungamusa bafi, ndizo akabgwilizigwa Isaki se wabva mu lufu.

Ne kugalamoyo Isaki wakathamila mhahhambuya Jakubo na Esau mahhuba ambeli.

Ne kugalamoyo Jakubo wakati efa, kathamila mhahhambuya mmwe ne mmwe we bakololo ba Josefa, enamata Ndzimu akanayila ludozo gugwe.

Ne kugalamoyo Josefa wakati abe pedlo nofa kaleba nekwe fuluka kwe Baiziraela bebva mu Egipiti, ngono kabalaya kuti abiganyiwe tjini.

Ne kugalamoyo Mushe wakati azwagwa kansumbika mimwedzi mitatu ne bazwadzi babe, ngobe bakabe babona akanaka, abazohla tjuluka nlayo wakabe wabigwa ndi He nkulu.

Ne kugalamoyo Mushe wakati akula kalamba dang'wa mwana we nkololokadzi wa Faro.

Wakahalula kudziyidziwa pang'ompela ne banhu be Ndzimu mu bumo gwe mizipo inopela ye tjibi.

Wakabona kuti lengudzigwa Khirisiti ifumwa whulu kupinda fumwa ye Egipiti, ngobe wakabe akalinga mbhayilo unowohha.

Ne kugalamoyo Mushe wakabva mu Egipiti asingahle buhongola gwa Faro, ngoti wakadzikitidza se unonga wakabe ebona iye usingaboneke.

Ne kugalamoyo wakathama ndongoloso ye Kupinda pehhugwi kanyasa malopa mu matendele kuti ndizo ntumwa we kudzimu unolobesa mbano dze Egipiti asitongo bulaya mbano dze Baiziraela.

Ne kugalamoyo banhu bakatjuluka Gungwa Haba se banoyenda pasi pakawoma; koga Baegipiti bakati behha beti banoyedza Baiziraela bakang'wa nkopkhwi bakafa.

Ne kugalamoyo makuma e Jeriko akawa, apotelekwa mahhuba ali kutendeka.

Ne kugalamoyo Rahabu we fukula aazoloba na ibabo bakabe basingawhe Ndzimu, ngobe aamutjila hodzi ne bunhu.

Tjimwe ini wali tjandingaleba tjinopinda ikoku? Andingawane lubaka gwe leba nekwa Gideoni, na Bharaki, na Samisoni, na Jefuta, na Dafite, na Samuele nenge balebesambeli.

Bakati ne kugalamoyo bakakunda mibuso, bakabusa ne ndulamo ngono bakawana tjabakabe bagadziwabgwe, bakahhalila milomo ye humba,

Bakadzima mimoto yakabangalala, bakadzeta mathumo anopiza, haya masimba kwabo kukahandugwa kukabe masimba, bakasima mu ngwa bakakunda babhayani be babva kule.

Bakadzi bakaamutjila bafi babo ne kumusiwa mu bafi. Bamwe bakadziyidziwa ngono bakalamba kusunungugwa, kuti ndizo bawane kumusiwa mu butjilo gunoyita.

Bamwe bakadadigwa bakalobgwa, bakasungwa ne dziketani bakalongwa mu ng'umba dze busungwa.

Bakakikithidziwa ne mabgwe, bamwe bakasahiwa bethubugwa napakati, bakabulawa ne thumo. Bakabe beyenda yenda bakaambala makukuta e mwhizi, kene e mbudzi, bali bahayi, bedziyidziwa basingabhakhwe zubuyanana.

Bakatendeleka se basina kanyi, beyenda mu tjilambanyika mu matombo, begala mu makuwhu nenge mu mimwina ye hango. Hango yakabe isakabafanila.

Bose ibaba nenguba bakakudziwa ne kugalamoyo kwabo, abazoamutjila tjakabe tjagadziwabgwe ne Ndzimu,

se Ndzimu wakabe watiwanila kutjikale tjimwe tjinoyita, kuti ndizo basitongothamiwa bakapelela basinaswi.