New Testament

Mu kutangisa Dama lakabe lili yapo, ngono Dama lakabe lina Ndzimu kakale Dama lakabe lili Ndzimu.

Lakabe lina Ndzimu mu kutangisa.

Zwinhu zose zwakathamiwa ndiye. Kuhhe kukwe akuna tjimwe tjakathamiwa tjisakathamiwa ndiye.

Muunli kwakabe kuna butjilo, butjilo guli tjedza tje banhu.

Tjedza tjopenya mu hhalima, koga hhalima alizotjikunda.

Kwakabe kuna mmwe nlume atumwa ne Ndzimu, zina lile kuyi Johani,

wakahhila kutendeka nekwe tjedza itjetjo, kuti banhu bose bagalemoyo ndiye.

Iye ne kukwe wakabe asi iye tjedza, koga, wakahha kuwopa butendeki nekwe tjedza itjetjo.

Tjedza tje malebeswa tjinovonekela banhu bose tjakabe tjihha mu hango.

Wakabe ali mu hango, koga nenguba Ndzimu wakathama hango ndiye, hango aizounziba.

Wakahha ku hango ya kanyi kukwe koga banhu ba kanyi kukwe bakasin'amutjile.

Koga ibabo bakan'amutjila, bakagalamoyo mu zina lile, wakabapa fanilo dze kube bana be Ndzimu.

Ibaba ate bakazwagwa ne lopa kene da kwe nyama, kene ne da kwe nhu, koga Ndzimu ndiye wakathama kuti babe bana babe.

Dama lakabe nhu, kagala pakati kwedu ana ngoni kwazo ne malebeswa. Takabona gudzo lile, gudzo le Nkololo uyega wa Tate.

Johani wakapa butendeki ne kukwe, wakamimila eti, “Ndiye iwoyu wandakaleba ne kukwe nditi, ‘Iye unohha hule kwangu nkulu pandili, ngobe wakabe yapo ndi sanhu abe yapo.’ ”

Ngobe ana ngoni njinji, wakatiwhila ngoni epamhulula.

Ndzimu wakatihhisila nlayo ndi Mushe, koga ngoni ne malebeswa takazwipiwa ndi Jesu Khirisiti.

Akuna ne nng'ompela wakatongo bona Ndzimu. Koga Nkololo uyega, ugele kubapa na Tate, ndiye wakazibisa Ndzimu banhu.

Ogu ndigo butendeki gwa Johani gwa akaleba lubaka Bajuta gwabakantumila Bapirisiti ne Balevi banobva mu Jerusalema kuwombhuzwa kuti ndiye ani.

Johani wakaleba, aazozwilandula; wakaleba eti, “Ate ndili imi Mesiya.”

Bakambhuzwa beti, “Ndiwe ani ngono? Ndiwe Elija?” Johani kabahandula kati, “Aa, ate ndili Elija.” Bakambhuzwa kakale bakati, “Ndiwe Nlebesambeli?” Kabadabila kati, “Aa.”

Bakati kuunli, “Ngono ndiwe ani? Utidabile kuti naswi tinobudza batituma. Ukatini ne kuko?”

Johani kadabila ne matama a Isaya nlebesambeli eti, “Ndimi whi le unodanilila mu tjilambanyika eti, ‘Tambunudzani zila ya He.’ ”

Bamwe be Bafarasi, bakabe batumwa

baka mbhuzwa beti, “Ha usi Mesiya, usi Elija kene nlebesambeli, ini ubvubika banhu?”

Johani kabadabila kati, “Ndomubvubika ne vula, koga pakati kwenyu kumile mmwe wamusingazibe.

Ndiye unohha hule kwangu, iye wandisakalizana kusunungula mitjili ye khwebana dzidze.”

Oku kwakabe kuhingikala mu Bhetani seli kwe gwizi gwe Jorodani, Johani kwaakabe ebvubikako.

Tjimuka, Johani kabona Jesu ehha kunli, ngono kati, “Bonani Mwhizana ye Ndzimu iyo inodusa tjibi tje hango!

Oyu ndiye wandakaleba ne kukwe nditi, ‘Kuna nlume unowohha hule kwangu, koga nkulu pandili, ngobe wakabepo kunditangila.’

Imi ne kwangu ndakabe ndisinganzibe, koga ndakahha ndibvubika banhu ne vula kuti ndizo azibgwe ne Baiziraela.”

Johani kapa butendeki eti, “Ndakabona Meya ideluka se njiba ibva kudzimu, ngono ikagala pehhugwi kukwe.

Ndakabe ndisinganzibe, koga iye wakandituma kuwobvubika ne vula wakati kundili, ‘Iye waunowobona Meya ideluka igala pehhugwi kukwe, ndiye unowobvubika ne Meya yakayengemala.’

Ndakambona ngono apa butendeki kuti ndiye Nkololo we Ndzimu.”

Tjimuka kakale Johani kabe ali mile ne badiyiwa babe babili,

ngono kati ebona Jesu epinda kati, “Bonani Mwhizana ye Ndzimu!”

Ibabo badiyiwa babili bakawha eleba ikoku, ngono bakatobela Jesu.

Jesu katjebuka, kababona bakantobela, ngono kababhuzwa kati “Mohakani?” Bakati kuunli, “Rabhi” Kobva kuti N'diyi. “Mogala poni?”

Kabadabila kati, “Ihhani mubone.” Bakayenda bakanobona paakabe egala, ngono bakawha masikati iyawo wose naye; gwakabe gungabe lubaka gwe bunna matewuko.

Mmwe we babili bakawha Johani elebeleka bakatobela Jesu ndi Enduru nnung'una wa Simoni Pita.

Tje kutanga Enduru wakanohaka nkulu uwe Simoni ngono kambva kati, “Tawana Mesiya”. Kobviwa kuti Khirisiti.

Kayisa Simoni kuna Jesu. Jesu kanlinga kati kuunli, “Ndiwe Simoni nkololo wa Johani ngono unowodang'wa Khefasi.” Khefasi ndilo zwalo Pita, kobviwa hongwe.

Tjimuka Jesu kayenda ku Galili. Kawana Filipo ngono kati kuunli, “Unditobele!”

Filipo wakabe ebva ku Bhetisaida, kanyi kwa Enduru na Pita.

Filipo kabona Natanaele ngono kambudza kati, “Tambona iye wakalebgwa ndi Mushe mu lukwalo gwe nlayo ne mu whalo dze balebesambeli. Iye Jesu we Nazareta nkololo wa Josefa.”

Natanaele kabhuzwa kati, “Apa kuna tjibuya tjingabva mu Nazareta kene?” Filipo kadabila eti, “Ihha ubone.”

Kukati Jesu ebona Natanaele ehha kuunli, kati, “Bonani, woyu ndiye N'iziraela wakwako, usingabhuzwiwe.”

Natanaele kambhuzwa kati, “Mondiziba tjini?” Jesu kan'dabila eti, “Ndakubona utjikusi kwe mpaya, Filipo asanhu kawokudana.”

Natanaele kan’handula eti, “N'diyi, mu Nkololo we Ndzimu, mu He nkulu we Iziraela!”

Jesu kati kuunli, “Unogalamoyo koga, ngobe ndakubudza kuti ndakubona utjikusi kwe mpaya. Utjawobona zwinhu zwikulu Pinda izwezwi!”

Kabuya kati kuunli, “Ndolebesa tjose ndoti kumuli, mowobona kudzimu kuhhuka ne batumwa be Ndzimu betanhila pehhugwi kakale bedelukila pasi mu Nkololo we nhu.”