New Testament

Ipapo Pilato katola Jesu kati ngaalobgwe.

Babhayani bakaluka tjiala tje mhiwa bakawumbadza itjo mu n’holo, bakawumbadza hazu ye mbala n’haba wakabondelela;

ngono bakayenda kuunli bakati, “Mabuyani, He nkulu we Bajuta,” bakampkhwaula mu luhaya.

Pilato kabhudila kuhhe kakale kati ku Bajuta, “Bonani, ndon'dusila kuhhe kumuli kumuzibisa kuti imi anditobona tjimwe tjandingantilika nlandu nditjo.”

Ndizo Jesu kabhudila kuhhe, akaambala tjiala tje mhiwa ne hazu ye buhaba gwakabondelela. Pilato kati kubali, “Woyu nhu wenyu!”

Bapirisiti bakulu ne balindi be Ng'umba ye Ndzimu bakati bembona, bakamimila beti, “Mumbambule! Mumbambule!” Pilato kati kubali, “Muntole imwi mumbambule. Imi anditobona tjimwe tjandingantilika nlandu nditjo.”

Mbunga we Bajuta ukan’handula uti, “Iswi tina nlayo unoti wakafanila kuti afe, ngobe kati Nkololo we Ndzimu.”

Pilato kati ewha ikoku kahla kwazo,

kabgwilila mu ng'umba ye nlauli kabhuzwa Jesu kati, “Unobva poni?” Koga Jesu kasindabile.

Pilato kati kuunli, “Apa autoda lebeleka nami kene? Autoziba kuti ndina simba le kukusunugula kose ne simba le kukubambula kene?”

Jesu kahandula eti, “Iwe ungabe usina simba mundili, apa wabe usakalipiwa libva kudzimu. Ndizo iye wandihhisa kukuli una tjibi tjikulu kupindisa.”

Pilato kati ewha ikoku, kagwisa wana zila yaangasunungula Jesu ndiyo. Koga Bajuta bakamimila beti “Ha unsungunula, unowobe usi nzwalani wa Kaisara! Mmwe ne mmwe unozwithama he nkulu, unonyanyayidza Kaisara!”

Pilato kati ewha matama iyawa, kadusila Jesu kuhhe, kagala mu tjigalo tje nsumikilisi mu bugalo gunodang'wa kuyi, “Budzilo gwe Mabgwe.” Mu Tjihebheru goyi “Gabhata.”

Kwakabe kuli masikati makulu kululwamisigwa Nzano we Pinda Pehhugwi. Pilato kati ku Bajuta, “Woyu He nkulu wenyu!”

Bakamimila beti, “Kutjena naye, kutjena naye mumbambule!” Pilato kababhuzwa eti, “Apa mohaka kuti ndibambule he nkulu wenyu kene?” Bapirisiti bakulu bakan'dabila beti, “Atina mmwe he nkulu kuhhe kwa Kaisara!”

Ndizo Pilato kabapa Jesu kuti anobambugwa. Bakatola Jesu bakayenda naye.

Wakabhuda akasenga tjileyano tjitje, kayenda kanoti ku bugalo gunoyi “Pepe tje N’holo.” Mu Tjihebheru godang'wa “Gologota.”

Ndiko kwabakanombambulilako ne bamwe balume babili, mmwe ku luboko gwe ludli, mmwe kuna gwe lumewhe, Jesu iye ali pakati kwabo.

Pilato kakwala tjizibiso katjinamatidza mu tjileyano tja Jesu. Matama atjo akabe ebalika sa oku, “JESU WE NAZARETA, HE NKULU WE BAJUTA.”

Banhu banjinji bakatjibala, ngobe panhu ipapo pakabambuligwa Jesu pakabe pali pedlo ne nzi nkulu. Tjizibiso itjetji tjakabe tjakakwagwa ne lulimi gwe Tjihebheru ne gwe Tjilatini ne gwe Tjigiriki.

Bapirisiti bakulu ne Bajuta bakati kuna Pilato, “Usikwale uti ‘HE NKULU WE BAJUTA’ kwala uti, ‘Iwoyu nlume kati, Imi ndi he nkulu we Bajuta.’ ”

Pilato wakabadabila eti, “Tjandakwala ndakwala.”

Babhayani bakati babambula Jesu, bakatola zwiambalo zwizwe bakazwikobana ne bunna gwabo, mmwe ne mmwe wabo katola tjing'ompela. Bakatola ne hempe iye, yakabe ili jila ling'ompela lakalukiwa lisina nthumo.

Bakalangana beti, “Tisiipalule, ngatikandileni tibone kuti inowobe ya ani.” Ikoku kwakahingikala kuti matama e Whalo dze Ndzimu asiwile pasi anoti, “Bakakobana zwiambalo zwangu hempe yangu bakailobela hakata.” Izwezwi ndizo zwakathamwa ne babhayani.

Mme ba Jesu bakabe bali mile pedlo ne tjileyano tjitje bana mannini babe Mariya, nkadzi wa Kileopasi, na Mariya we Magadala.

Jesu kabona mmeyabe ne n'diyiwa waakabe eda bali mile ipapo, ngono kati kuna mmeyabe, “Nkadzi nkulu, nkololo wenyu whoyo.”

Kati ku n'diyiwa iwoyu, “Abo mmeyabo.” Kubvila mu lubaka igogo n'diyiwa iwoyo katola Mariya kanogala naye ku nzi uwe.

Jesu kaziba kuti ngwenu kose kwawila, koga kuti matama e Whalo dze Ndzimu asiwile pasi kati, “Ndina nyota.”

Kwakabe kuna ndilo ihhele nkumbi unobaba, ngono bakabvubika lungudze muunli, bakagupomba mu luhanga gwe nti unoyi hosapu, bakayisa ku nlomo uwe.

Jesu kang'wa ngono kalebeleka kati, “Kwapela!” Kakotamisa n’holo uwe ngono meya ikathubukana ne nyama.

Bajuta bakakumbila Pilato kuti makumbo e balume babambugwa avung'we ne mibili yabo idelusiwe mu zwileyano. Bakakumbila bejalo, ngobe kwakabe kuli hhuba le kuzwilulwamisa, basingahake kuti mibili iyeyi ibe ili mu zwileyano mu nsi we Sabatha.

Ndizo babhayani bakayenda bakanovuna makumbo e nlume we kutanga kubvapo bakavuna e mmwe wakabe abambugwabo na Jesu.

Bakati behha pana Jesu, bakabona kuti wafa kale, ngono bakasivune makumbo awe.

Mmwe we babhayani, kabhaya Jesu ne thumo mu lubabvu, ngono kukatebuka malopa ne vula.

Nlume wakabona ikoku kuhingikala wakapa butendeki ne kwako, kuti namwibo mugalemoyo. Butendeki gugwe malebeswa, na iye unoziba kuti unoleba malebeswa.

Oku kwakahingikala kuti matama e Whalo dze Ndzimu asiwile pasi, anoti, “Akuna fupa lile linowovung'wa.”

Gumwe lukwalo goti, “Banowolinga kuunli iye wabakabhaya.”

Hule kwa ikoku, Josefa we Arimateya, kayenda kanokumbila Pilato kuti ampe tjidumbu tja Jesu. Josefa wakabe ali n'diyiwa wa Jesu wakabe asingazwilakidze, ngobe akabe ehla Bajuta. Pilato kambvumila kuti atole tjidumbu tja Jesu, ngono kayenda kanotjitola.

Nikodemo, iye wakatongo yenda kunobona Jesu busiku, kayenda na Josefa akasenga mafuta e motsha unodang'wa kuyi mira unolizana kilogiramu dzili makumi matatu ana nhatu, wakahanganyiwa ne gonde.

Bakatola tjidumbu tja Jesu bakatjipetela ne jila betjihodza mafuta e motsha kuyendidzana ne mpanga we Bajuta we biganya.

Kwakabe kuna nnda ipapo pakabambuligwa Jesu, ngono muunli kwakabe kuna kumbu tjitshwa tjisakatongo biganyiwa nhu.

Sekwa kabe kuwomuka kuli Sabatha, kakale kumbu na itjo tjili pedlo, bakambiganya mutjili.