New Testament

Kwakati He basinoziba kuti Bafarasi bakawha kuti Jesu unobvubika kakale unothama badiyiwa banji Pinda Johani,

(nenguba, Jesu ne kukwe akabe asingabvubike banhu, badiyiwa babe ndibo bakabe bedubika.)

Ndizo Jesu kabhuda mu Judiya kabgwilila ku Galili.

Ngono wakabe akafanila pinda akapalama ntunhu we Samariya.

Ndizo kangina ne nzi we Samariya unoyi Sikari, pedlo ne nnda wakabe wapiwa Josefa ndi tate babe Jakobe.

Tshime la Jakobe lakabe lili ipapo, ngono Jesu kati anyadziwa ne gwendo kagala pasi pa whunde ne tshime. Kwakabe kuli ne lubaka gwe masikati makulu.

Ngono kukahha nkadzi we Nsamariya kuwotjela vula, ngono Jesu kambva kati, “Undipebo vula nding'we.”

Badiyiwa babe bakabe bayenda kunotenga zodliwa ku nzi.

Nkadzi iwoyo kan’handula eti, “Ungandikumbila vula tjini wali, iwe uli Njuta, imi ndili nkadzi we Nsamariya kene?” Bajuta abatohingidzana ne Basamariya.

Jesu kan’handula eti, “Ha wabe uziba tjipo tje Ndzimu ne nge kuti ndiani iwoyu unokukumbila vula, unobe wakumbila vula kuunli, unobe akupa vula ye butjilo.”

Nkadzi kan'dabila eti, “Tate bangu, amuna tjamungatjela nditjo, ngobe tshime ileli lakangina, ngono imwi moiwana poni iyeyo vula ye butjilo kene?

Apa imwi mu nkulu pana tate bedu Jakobe bakatipa tshime ileli kene, labakang'wa mulili ne bana babo nenge zwipfuwo zwabo?”

Jesu kadabila eti, “Iye unong'wa vula iyeyi unowobe ne nyota kakale,

koga iye unowong'wa vula yandinowompa aatowopamha kabe ne nyota kakale. Ngobe vula yandinowompa, inowobe nsenya munli unowobvilila vula inowompa butjilo gusingapele.”

Nkadzi kati kuunli, “Tate bangu, mundipe vula iyeyo kuti ndisitjabe ne nyota kakale, kakale ndisitjabuye awotjela vula ngeno.”

Jesu kambva kati, “Yenda unodana nlume uwo ubuye naye.”

Nkadzi kan’handula eti, “Andina nlume.” Jesu kambva kati, “Unolebesa ha uti auna nlume.

Wakabe ne balume bali bahanu, nlume waunaye ngwenu ate ali uwo. Wandibudza malebeswa.”

Nkadzi kati kuunli, “Tate bangu, ndobona kuti mu nlebesambeli.

Botate bedu bakabe benamata Ndzimu pehhugwi kwe dombo ileli, koga imwi Bajuta mukati bugalo gwa takafanila namata Ndzimu i Jerusalema.”

Jesu kati kunli, “Galamoyo mundili, kowohha lubaka gwe kuti Tate basinamatigwe pehhugwi kwe dombo ileli kene iko ku Jerusalema.

Imwi Basamariya monamata tjamusingazibe, koga iswi tonamata tjatinoziba, ngobe jidzo lobva ku Bajuta.

Koga lubaka gohha na iko gwaswika kale, gunowoti banamati be malebeswa bakanamata Tate ne Meya ne nge malebeswa, ngoti ndibo banamati banohakwa ndi Tate.

Ndzimu Meya, ngono ibabo banounamata bakafanila kuunamata ne Meya nenge malebeswa.”

Nkadzi kambva kati, “Ndoziba kuti Mesiya, unodang'wa Khirisiti unowohha, ngono ha ehha unowotitjenesela zwinhu zose.”

Jesu kambva kati, “Imi ndinolebeleka nawe, ndi iye wandili iye”

Ne lubaka igogo badiyiwa ba Jesu bakabuya kwabakabe bayenda, bakatjenama bewana elebeleka ne nhu we tjikadzi. Koga akuna wakabhuzwa nkadzi iwoyo kuti, “Unohakani?” Kene wakabhuzwa Jesu kuti, “Ini ulebeleka ne nkadzi iwoyo?”

Ipapo nkadzi kasiya habana iye ye vula kabgwilila ku nzi ngono kati ku banhu,

“Ihhani mubone nlume wandibudza tjimwe ne tjimwe tjandakahinga. Apa ungabe ali iye Mesiya kene?”

Banhu bakabhuda mu nzi bakayenda kuna Jesu.

Ne lubaka igogo badiyiwa babe bakabe benkumbila beti, “N'diyi, idlani tjimwe!”

Koga kabadabila eti, “Ndina zodliwa zwandinodla zwamusingazibe.”

Badiyiwa bakabhuzwana beti, “Kungabe kuna mmwe wabahhisila zodliwa kene?”

Jesu kababva kati, “Zodliwa zwangu whuhinga da kwe wakandituma ne pedzisa n’hingo uwe.

Apa imwi amutoti, ‘Kwasala mwedzi minna kuti kuvung'we mapfunde kene?’ Koga imi ati, tongo poselani meho ku minda, mubone mapgunde sekwa akayibva, atjilinda vung'wa!

Iye unovuna unoamutjila ndipo, ekubunganyila mapfunde mu butjilo gusingapele, kuti ndizo ndzwali ne nvuni bahanhe bose.

Ndizo malebeswa matama anoti, ‘Mmwe unodzwala, ngono kovuna upoga.’

Ndakamutuma kunovuna pamusakahinga, kuna bakabe bahinga, imwi makavuna mu masimba abo.”

Bunji gwe Basamariya mu nzi iwoyo bakagalamoyo muna Jesu, ne butendeki gwe nkadzi iwoyu ngobe wakabe ati, “Wandibudza tjimwe ne tjimwe tjandakahinga.”

Ngono kwakati Basamariya bahha kuna Jesu, bakankumbila kuti agale nabo, ngono kagala nabo mahhuba mabili.

Bunji gumwe gwe banhu gwakagalamoyo nekwe matama a Jesu.

Bakati ku nkadzi, “Togalamoyo ngwenu, ngono kusi ne wha tjawaleba, koga kuli ne tjatazwiwhigwa ne kwedu, totjiziba kuti ndiye tjose Ntjidzi we hango.”

Hule kwe mahhuba iyawo mabili kayenda ku Galili,

ngobe iye Jesu ne kukwe wakabe aleba eti, “Nlebesambeli aatokudziwa mu hango ya kanyi kwabo.”

Kukati eswika mu Galili, banhu baikoko bakan'amutjila, ngobe bakabe bayenda ku Jerusalema ku nzano, ngobe bakabebabona tjimwe ne tjimwe tjaakahinga mu nsi we nzano.

Ipapo Jesu kabgwilila ku nzi we Kana mu ntunhu we Galili, kwaakabe atongo handula vula ikabe nkumbi. Kwakabe kuna nlume ali Gulukota wakabe egwaligwa ne nkololo uwe ali mu Kapenaume.

Kati ewha kuti Jesu wahha ku Galili ebva ku Judiya, kayenda kuunli kankumbila kuti ahhe kuwopodza nkololo uwe wakabe abe pedlo ne lufu.

Jesu kati kuunli “Kuhhe kwe kuti mubone zwilakidzo ne mihingo ye matjenamiso amungagalemoyo kene?”

Gulukota ilelo likadabila liti, “He, ihhani mwanangu asanhu kafa.”

Jesu kati kuunli, “Yenda, nkololo uwo unowotjila!” Kagalamoyo matama a Jesu kayenda kanyi.

Kati ali mu zila ebgwilila kanyi kahangana ne balanda babe bakambudza kuti nkololo uwe unotjila.

Kababhuzwa kuti nkololo uwe wapodziwa ne lubaka gupi, ngono bakan'dabila beti, “Luhhahhamo gwakabhuda munli madekwe mu lubaka gwe matewuko e hhuba.”

Ipapo tate babe bakakumbula kuti ndigo lubaka gwaakabviwa ndi Jesu kati, “Nkololo uwo unowotjila.” Ndizo iye ne be n’ha uwe bose bakagalamoyo.

Itjetji tjilakidzo tje bubili tjakathamiwa ndi Jesu abuya ku Galili ebva ku Judiya.