New Testament

Banji bakazwipa kwala mbiko ye zwinhu zwakahingikala pakati kwedu,

koga sekwa takazwibudziwa ndi ibabo bakabe balipo kutanga, bali batendeki kakale bali bahingili be dama le Ndzimu.

Ndizo se imi ndakahakisisa ne njele tjimwe ne tjimwe, kutangisa, ndawana kwakandilulwamila kuti ndimukwalile ndebo yakatambunuka, imwi tate Teofilo,

kuti ndizo muzibe malebeswa nekwe zwinhu zwamakadiyiwa.

Mu misi ya Herode he nkulu we Judiya, kwakabe kuna mphirisiti edang'wa kuyi Zakariya, ali mmwe we goko la Abhiya, ngono wakabe ana nkadzi zina lile lili Elizabeta ali mmwe we zwizekugwana zwa Aroni.

Bubili gwabo, bakabe bali balulwami mu meho e Ndzimu, basina nlandu belondolodza milayo ya He yose, ne ndaulo dzidze.

Koga bakabe basina bana ngobe Elizabeta wakabe asingathame bana, kakale bakabe bakwegula bose bubili.

Ndizo kukati kuli zolo le goko la Zakariya bhata n’hingo we buphirisiti se kwaakabe ali mphirisiti we Ndzimu,

kahalugwa ne hakata kuyendidzana ne tjilenje tje buphirisiti ngina mu Ng'umba ye Ndzimu He ne pisa motsha.

Mu lubaka igogo gwe pisa motsha, gubungano le banhu lakabe litembezela kuhhe kwe Ng'umba ye Ndzimu.

Ipapo ntumwa wa He kazwilakidza kuunli, ali mile ku ludli gwe tjibeso tje motsha.

Kukati Zakariya embona, kadziyidzika kakale katjenama, ngono kahla kwazo.

Koga ntumwa we kudzimu kati kuunli, “Usihle Zakariya, ntembezelo uwo wawhika. Nkadzi uwo Elizabeta unowokuwanila mwana we tjilisana, ngono unowon'dana uti Johani.

Unowobe ne kuhanha ukapululudza, ne banji banowohanha mu kuzwagwa kukwe,

ngobe Johani unowobe nkulu mu meho a He. Aatowong'wa nkumbi we n’hhambi, kene tjimwe tjing'o tjakabila. Ngobe unowohhadziwa ne Meya yakayengemala kubvila tjose atji mu tjibumbilo tja mmeyabe.

Unowohandusila bana banji be Iziraela kuna He, Ndzimu wabo.

Kakale unowoyenda mbeli kwa He mu meya ne mu masimba a Elija, ehandusila mimoyo ya botate ku bana babo, ne basingawhe kathama kuti bawhilile Ndzimu bayende mubutjejebvu gwe balulwami, elulwamisila banhu hha kwa He.”

Ngono Zakariya kabhuzwa ntumwa kati, “Ndingabe ne malebeswa tjini nekwa ikoku? Ndi nhuntana ne nkadzi wangu wakwegula.”

Ntumwa we kudzimu kan'dabila kati, “Ndimi Gabhariyele, imi ndinoma mbeli kwe Ndzimu misi yose. Ndatumwa kulebeleka nawe ne kukubudza ndebo mbuya iyeyi.

Bona! Unowobe mbebebe ukasilebeleke kuswikila hhuba linowohingikala zwinhu izwezwi, ngobe auzogalamoyo matama angu, anowohhadzisika ne lubaka gwawo.”

Ipapo banhu bakabe bakalindila Zakariya, ngono bakatjenamisiwa ne nonoka kukwe mu Ng'umba ye Ndzimu.

Ngono kukati ebhuda, kasitubule lebeleka nabo. Bakaziba ha abona mbono mu Ng'umba ye Ndzimu. Wakalebeleka nabo nge maboko koga asingatubule kulebeleka nge nlomo.

Kukati zolo lile lawila le hinga lapela kabgwilila kanyi.

Hule kwe mahhuba iyawo nkadzi uwe Elizabeta kazwisenga ngono kazwisumbika mwedzi ili mihanu,

eti “He wandihingila ikoku mu mahhuba iyawa, wandilinga ne ngoni dzidze kandidusa honi pakati kwe banhu.”

Hule kwe mimwedzi ili mitanhatu Elizabeta akazwisenga, Ndzimu wakatuma ntumwa wawo Gabhariyele ku Nazareta nzi u mu ntunhu we Galili

ku mmwanadi wakabe akabiganyidzigwa ndobolo ne nlume wakabe eyi Josefa, we n’ha wa Dafite. Zina le mmwanadi iwoyo lakabe lili Mariya.

Ntumwa we kudzimu kayenda kuunli kati, “Ndokubuyisa iwe unodika kwazo, He banawe!”

Mariya kadziyidzika kwazo ne matama awe, ngono katjenama kuti whubuyisa kwakatini ikoku.

Koga ntumwa we kudzimu kati kuunli, “Usihle, Mariya, Ndzimu wakuda.

Unowozwisenga, ngono ukawana mwana we tjilisana, unowontumila zina uti Jesu.

Unowobe nkulu, kakale unowodang'wa Nkololo we Ndzimu Upehhugwi hhugwi. He Ndzimu banowompa tjigalo tje buhe gwa batategulu babe Dafite,

ngono unowobusa ne kusingapele mu ng'umba ya Jakubo, buhe gugwe agutowopela.”

Mariya kabhuzwa ntumwa we kudzimu eti, “Ikoku kowohingikala tjini, se ndili mmwanadi ndisanhu aziba nlume kene?”

Ntumwa we kudzimu kan’handula eti, “Meya yakayengemala inowohha mukuli ne masimba e Ndzimu Upehhugwi hhugwi anowobe mukuli. Ndizo mwana iwoyo waunowozwala, unowobe N'yengemali, kadang'wa kuyi Nkololo we Ndzimu.

Na Elizabeta gamu lilo, unowobe ne mwana nenguba akakwegula, iye wakabe ali balumbila umu mwedzi uwe we butanhatu.

Akuna tjisingatubuke ku Ndzimu.”

Mariya kahandula eti, “Imi ndi nlanda wa He, ngakuhingikale kundili sekwa waleba.” Ipapo ntumwa we kudzimu kansiya.

Kukati mu mahhuba iyawo Mariya kazwilulwamisa, kalibilidza kayenda ku nzi umu ntunhu we matombo, e Judiya,

ngono kaswika kangina mu nzi wa Zakariya, kabuyisa Elizabeta.

Ndizo kukati Elizabeta ewha buyisa kwa Mariya, mwana katjuLuke mu ntumbu uwe, Elizabeta kahhala Meya yakayengemala.

Kalebelekela pehhugwi kati, “Unamhahhambuya mu bakadzi bose, ndizo unamhahhambuya mwana waunowowana!

Koga ini kwahingikala kuti mme ba He wangu, bahhe kundili?

Ndati koga ndiwha ubuyisa, mwana umu ntumbu wangu katjuLuke ne hanha.

Unamhahhambuya ngobe wakagalamoyo kuti matama awakabudziwa ndi He anohingakala!”

Mariya kati, “Meya yangu inokudza He.

Meya yangu inohanha nekwe Ndzimu Ntjidzi wangu,

ngobe wayitila hanya butukununu gwe nlandakadzi uwe. Kubva nasi zwizekugwana zose zondidana unamhahhambuya,

ngobe Ndzimu Masimbawose wandihingila zwikulu, Zina lawo lakayengemala.

Unowhila zogwadza ibabo banouhla, banouteta kubva mu tjizekugwana kunoti mu tjizekugwana.

Wakathama zwikulu ne luboko gwawo; Ukapaladza ibabo banozwikudza, mumimoyo yabo.

Wakadelusa bohe mu zwigalo zwabo zwe buhe. Koga ukamilidzila pehhugwi ibabo batukununu.

Wakagutsha bana hhala ne zwihu zwakanaka, koga bafumi kabahandusa bakalembedza maboko.

Wakabhatsha nlanda uwe Iziraela, ukumbulukigwa mawhilo zogwadza,

sekwa wakalebeleka na botate bedu, bo Abhurahama ne zwizekugwana zwabo kusingapele kose.”

Mariya kagala na Elizabeta kungabe mimwedzi mitatu, kubvapo kabgwilila kanyi.

Kwakati lubaka gwatjihha, gwe kuti Elizabeta awane mwana, katshibama mwana we tjilisana.

Ngono babakidzani naye ne makamu awe bakawha kuti He wakan’whila ngoni kukulu, bakahanha naye.

Ndizo mu hhuba le buhhanakadzi (8) bakahha kuwothumbila mwana, bakabe bewuntumila beti Zakariya, zina la tate babe.

Koga mmeyabe bakalebeleka beti, “Akutowojalo, unowodang'wa kuyi Johani.”

Bakati kuunli, “Akuna mmwe pakati kwe makamu awo una zina ilelo.”

Ndizo bakalebeleka ne maboko na tate babe, behako ziba kuti ibo tate be mwana banoda ntumila beti ani.

Zakariya kakumbila bgwe linokwaligwa, ngono kakaabadza mmwe ne mmwe ngokwala eti, “Zina lile ndi Johani.”

Tjinyolotjo kahhula nlomo ne lulimi gugwe gukasununguka, katangisa lebeleka, elumbidza Ndzimu.

Babakidzani naye bakatjenama kwazo ne mu ntunhu wose we matombo we Judiya, banhu bakabe belebeleka nekwe zwinhu izwezwi zose.

Mmwe ne mmwe wakawha ikoku ezwibhuzwisisa eti, “Mwana iwoyu ini tjaanowobe itjo ngono?” Ngobe simba la He lakabe lilimuunli.

Tate ba Johani Zakariya bakahhala Meya yakayengemala, ngono baka-lebelambeli beti,

“Gudzo ngalibe muna He, Ndzimu we Iziraela, ngobe wahha ku banhu bawo ukabadzutunula.

Watihhisila Ntjidzi una masimba unobva mu ng'umba ye nlanda uwe Dafite.

Sekwa wakaleba ne balebesambeli bawo bakayengemala kubva ntolo,

kuti takafanila tjidziwa mu zwita zwedu, ne mu maboko abose bakatibenga.

Wakathama ikoku kulakidza mawhilo zogwadza akagadziwabgwe bobatategulu bedu, ne kumbula tjibvumano tjawo tjakayengemala,

ne tuna kwawakatuna kuna tate bedu Abhurahama,

kutisunungula mu maboko e zwita zwedu, kuti titubule hingila He tisingahle tjimwe

mu kuyengemala ne lulwama mbeli kukwe, mu butjilo gwedu gose.

Nawe mwanangu, unowodang'wa nlebesambeli we Ndzimu Upehhugwi hhugwi, ngobe unowoyenda mbeli kwa He kunlulwamisila zila

kupa banhu ba He zibo ye kuti jidzo lohha ne kuzwibhatigwa kwe zwibi zwabo,

ne mawhilo zogwadza e Ndzimu kowopenya tjedza mutili tjibva hhuhhugwi.

Kupa tjedza ibabo bagele mu hhalima ne bamu ntuzi we lufu, kutitungamilila mu zila ye kunyalala.”

Ngono mwana kakula kasima mu meya, ndizo kagala mu tjilambanyika kudzina eboneka patjena ku Iziraela.