New Testament

Oku ndiko tangisa kwe ndebo mbuya ya Jesu Khirisiti Nkololo we Ndzimu,

sekwa kwakakwagwa ndi Isaya nlebesambeli mu lukwalo gugwe eti, “Ndotuma ntumwa wangu mbeli kuko, iye unowolulwamisa zila iyo.”

“Whi le unodanilila mu tjilambanyika eti, ‘Lulwamisani zila ya He, tambunudzani zidlana dzidze.’”

Johani we Mbvubiki kaswika mu tjilambanyika, esumikila kuti banhu bahandukile matjinyo abo babvubikwe ili tjilakidzo tje kuti bazwiibhatigwa matjinyo abo.

Hango yose ye Judiya ne banhu bose be Jerusalema bakabhuda bakayenda kuunli. Bakazwileba matjinyo abo, ngono kababvubika mu gwizi gwe Jorodani.

Johani wakabe eambala zwiambalo zwakathamiwa ne bukuse gwe kamela, ne mmwandabula we ganda mu nhunji dzidze. Wakabe edla mhaho ne butji gwe nyutji.

Kasumikila eti, “Hule kwangu kowohha una masimba kundipinda, iye wandisakalizana kotama ndisunungula mitjili ye khwebana dzidze.

Ndomubvubika ne vula, koga iye unowomudubika ne Meya yakayengemala.”

Mu mahhuba iyawo Jesu kahha ebva ku nzi we Nazareta mu ntunhu we Galili, ngono kabvubikiwa ndi Johani mu gwizi gwe Jorodani.

Kwakati Jesu ebhuda mu vula, kabona kudzimu kuhhuka, ngono Meya yakayengemala ikadelukila muunli se njiba.

Whi likabva kudzimu liti, “Iwe u Nkololo wangu, iye wandinoda, unondihanhisa kwazo.”

Tjinyolotjo Meya ikantakulila ku tjilambanyika.

Wakabe mu tjilambanyika mahhuba ali makumi manna, elikiwa ndi Satani. Wakabe ana mhuka dze hango, ngono batumwa be kudzimu bakambhatsha.

Kukati Johani alongwa mu ng'umba ye busungwa, Jesu kahha mu Galili esumikila ndebo mbuya ye Ndzimu.

Wakabe eti, “Lubaka gwahha. Buhe gwe Ndzimu gwasedzela. Handukilani matjinyo enyu, mugalemoyo mu ndebo mbuya.”

Jesu wakati eyenda ali mu whunde ye gungwa gwe Galili, kabona Simoni ne nnung'una uwe Enduru, beposela gwanga mu gungwa, ngobe bakabe bali babhati be whobe.

Jesu kati kubali, “Ihhani munditobele, ndowomuthama babhati be banhu.”

Tjinyolotjo bakasiya njanga dzabo, bakantobela.

Wakati ayenda nhambgwana kabona Jakubo nkololo wa Zebhedi na Johani nnung'una uwe, bali mu n'goro belulwamisa njanga dzabo.

Tjinyolotjo kabadana, ndizo bakantobela besiya tate babo Zebhedi mu n'goro bana bahingi.

Bakayenda ku nzi we Kapenaume, ngono kukati ne nsi we Sabatha, Jesu kangina mu ng'umba ye Bajuta ye mitembezelo katangisa diya.

Banhu bakatjenamila diya kukwe, ngobe wakabe ediya se nhu una ndaulo, asingange badiyi be nlayo.

Imomo mu ng'umba yabo ye mitembezelo kwakabe kuna nlume wakabe ana meya mbi,

ngono kamilidza whi kalebeleka eti, “Unohakani mutili iwe Jesu we Nazareta? Wahha kuwotilobesa kene? Ndoziba kuti uani, u N'yengemali we Ndzimu!”

Koga Jesu kantjemela kati, “Nyalala ubhude muunli!”

Meya mbi ukazunguza nlume iwoyo kwazo, ukabhuda muunli utjema.

Banhu bose bakatjenama kwazo, bakabhuzwana bakati, “Ikoku kunohingikala ini kene? Whudiya kutshwa! Unotjemela na iyo meya mibi dumbu ne ndaulo, ngono inon’wha.”

Tjinyolotjo tjilumbi tjitje tjikaandama mu ntunhu wose we Galili.

Kati ebhuda mu ng'umba ye mitembezelo bakayenda tjinyolotjo ku nzi wa Simoni na Enduru, bana Jakubo na Johani.

Mmezwale ba Simoni bakabe bali lele bana luhhahhamo, ndizo bakabudza Jesu ne kwabo.

Kayenda kubali kababhata ne luboko kabaahha kumilika, ngono luhhahhamo gukabhuda mu bali ndizo bakatangisa pa bezi zodliwa.

Madekwana iyawo, hhuba langina banhu bakahhisa bagwele bose ne banhu bana meya mibi kuna Jesu.

Nzi wose ukakubungana pa nkoba we ng'umba.

Ngono Jesu kapodza banjinji bakabe bana magwele akasiyana. Kakale kadusa meya mibi minjinji, koga asingaibvumile kuti ilebeleke ngobe yakabe inziba.

Kukati kutji lukundawudze, Jesu kamuka, kabhuda mu ng'umba kayenda kuhango kwaakaswika katembezela.

Simoni ne baakabe anabo bakanlonda,

bakati ben'wana bakambva bakati, “Mmwe ne mmwe unomuhaka.”

Koga Jesu kati kubali, “Ngatiyendeni ku mizi ipedlo, kuti ndizo ndinosumikila ikokobo, ngoti nditjo tjandakahhila.”

Kayenda mu Galili yose esumikila mu ng'umba dzabo dze mitembezelo, kakale edusa meya mibi mu banhu.

Nlume wakabe egwala mapele kahha kuunli, kankumbila akapfigama eti, “Ha muda, mungandipodza.”

Jesu kan’whila ngoni, katambunudza luboko gugwe, ngono kambhata kati kuunli, “Ndoda kuti upole; pola.”

Tjinyolotjo mapele kapola, kasala ali mbuyanana.

Jesu kanlaya akasimisa

eti, “Kuhaye wawabudza ikoku, koga uyende unozwilakidza ku mphirisiti, uduse tjibhayilo tje podziwa kuko sekwakaleba Mushe, kuti tjibe tjilakidzilo mu banhu.”

Koga kabhuda, ngono katangisa leba akahalabvuka eandamisa tjan’hingikalila. Ikoku kukatjikonedza Jesu ngina mu nzi akasununguka, kagala mu hango, ngono banhu bakahha kuunli bebva mu magalo amwe ne amwe akasiyana.