New Testament

Jesu kabva ipapo kayenda ku ntunhu we Judiya na seli kwe Jorodani. Mibunga ye banhu ikankubunganila kakale, ndizo ne wolobela kukwe, kabadiya.

Ipapo kukahha kuunli Bafarisi behaka kuti banlike, bakambhuzwa bakati, “Apa kumu nlayo kuti nlume alambe nkadzi uwe kene?”

Jesu kabahandula ne mbhuzo eti, “Mushe wakamulaya etini?”

Bakan’handula beti, “Mushe wakatibvumila eti, ha nlume elamba nkadzi uwe, ampe lukwalo gwe kuthubukana mu ndobolo, anlambe.”

Ndizo Jesu kababva kati, “Mushe wakamukwalila nlayo iwoyu eyikhwa ne mimoyo yenyu mikukutu.

Koga kubvila pa bumbiwa kwe hango, ‘Ndzimu wakababumba we tjilume ne we tjikadzi.’

‘Ndizo wali nlume unowosiya mmeyabe na tate babe kabhatana ne nkadzi uwe,

ngono ibaba babili banowobe mbili nng'ompela.’ Ndizo abatji banhu babili, koga babe mbili nng'ompela.

Ndizo Ndzimu tjawabhatshanya, kuhaye nhu watjithubukanya.”

Kukati bali mu ng'umba badiyiwa babe bakambhuzwa kakale nekwe matama iyawa.

Ngono kati kubali, “Iye unolamba nkadzi uwe elobola mmwe nkadzi, unothamila nkadzi uwe bupombgwe.

Na iyebo nkadzi unolamba nlume uwe kalobogwa ne mmwe nlume, unobe ethama bupombgwe.”

Banhu bakabe behhisa bana kuunli, kuti ndizo ababhate; ngono badiyiwa bakabatjemela.

Jesu kati ebona ikoku kagwadzamoyo, kabva badiyiwa babe kati, “Letjani bana bahhe kundili, musibadzibile, ngobe buhe gwe Ndzimu nde gwe bakajali.

Ndolebesa ndoti kumuli, iye usingaamutjile buhe gwe Ndzimu se mwana, aatowongina muguli.”

Ndizo kabatola ne maboko awe, kabayemulila mhahhambuya ne kubabiga maboko.

Kwakati Jesu etangisa gwendo gugwe, mmwe nlume kanlabukila kapfigama mbeli kukwe, kankumbila kati, “N'diyi wakalulwama, ndithameni kuti ndiamutjile butjilo gusingapele?”

Jesu kan’handula eti, “Ini undidana uti ndakalulwama? Akuna wakalulwama kuhhe kwe Ndzimu woga.

Unoziba milayo inoti, ‘Usibulaye, usithame bupombgwe, usikwibe, usipe butendeki gwe manyepkhwa, usitjebele, kudza tate babo na mmeyabo.’”

Ngono kati kuunli, “N'diyi, kose ikoku ndakakulondolodza, kubvila mu butjetjana gwangu.”

Jesu kanlinga ne ludo, kati kuunli, “Kuna tjinhu tjing'ompela tjaunohaya. Yenda unotengesa kose kwaunako, ukobele bahayi, ngono unowobe ne fumwa kudzimu. Kubva ipapo uhhe unditobele.”

Nekwa ikoku tjiso tjitje tjikafubala, ngono kayenda ana buyendasi, ngobe wakabe akafuma kwazo.

Jesu kalinga kupoteleka, kati ku badiyiwa babe, “Kwakasima seni kuna ibabo bana fumwa, kuti bangine mu buhe gwe Ndzimu.”

Matama iyawa kakaabadza badiyiwa ba Jesu. Koga Jesu kati kubali kakale, “Bana, kwakasima seni ngina mu buhe gwe Ndzimu.

Kulelu mu kamela kuti ingine mu buli le lunji, pakuti mfumi angine mu buhe gwe Ndzimu.”

Bakakaabala kwazo, ndizo bakati kuunli, “Ndiani ngono ungatjidziwa?”

Jesu kabalinga, ngono kati, “Mu nhu akutotubuka, koga akuzojalo mu Ndzimu, ngobe zwinhu zose zotubuka mu Ndzimu.”

Pita katangisa kati kuunli, “Bonani, takasiya zose tikamutobela.”

Jesu kati, “Ndolebesa ndoti, akuna wakasiya nzi uwe, kene bana ba tate babe, kene mme, kene tate, kene bana, kene minda nekwe zina langu ne Ndebo mbuya,

usingawoamutjila kwaakasiya kazana mu misi iyeyi, ng'umba ne bana ba tate babe na bomme ne bana ne minda kose ne tshiyilo, ngono mu misi inohha kawana butjilo gusingapele.

Koga banji be kutanga banowobe be bupelo ne be bupelo banowobe be kutanga.”

Bakabe ngwenu babe mu zila betanhila ku Jerusalema. Jesu wakabe eyenda ali mbeli kwabo, ngono bakatjenama, ibabo bakabe bakantobela bakahla. Katola bali gumi lina babili kakale, katangisa babudza tjinowonhingikalila.

Eti, “Bonani, totanhila ku Jerusalema, ngono Nkololo we Nhu unowolongwa mu maboko e Baphirisiti bakulu ne badiyi be nlayo, banowontilika nlandu kuti abulawe, banowonlonga mu maboko e Bezwitjaba.

Banowon'dadila bempfila mate benloba ne rwabha, bakambulaya, koga hule kwe mahhuba matatu unowomuka.”

Ipapo Jakubo na Johani, bakololo ba Zebhedi, bakayenda mbeli kuna Jesu bakankumbila beti, “N'diyi, tohaka kuti utithamile tjimwe ne tjimwe tjatinokukumbila.”

Jesu kababhuzwa kati, “Ini tjamunohaka kuti ndimuyitile?”

Bakan’handula bakati, “Utipe fanilo ye kuti tigale mmwe ku luboko gugo gwe ludli, mmwe kuna gwe lumewhe, mu buhe gugo.”

Koga Jesu kabadabila eti, “Amutoziba tjamunokumbila. Apa mungatubula ng'wa nkombe wandiwonong'wa, ne bvubikwa kwandinowobvubikiwa ndiko kene?”

Bakan’handula beti, “Tingakutubula.” Jesu kababva kati, “Nkombe iwoyu wandinong'wa, mowoung'wa ne bvubikwa ikoku kwandinobvubikwa ndiko, mowobvubikwabo ndiko.

Koga gala ku luboko gwangu gwe ludli kene ku luboko gwangu gwe lumewhe akutopiwa ndimi, koga ndekwa ibabo bakwakabigigwa.”

Ngono kukati bamwe badiyiwa bali gumi bewha matama iyawa, bakagwadzilamoyo Jakubo na Johani.

Ipapo Jesu kabadanila kuunli, ngono kababva kati, “Moziba kuti ibaba banoyi ndibo babusi be zwitjaba, banobabusa ne kubadziyidza, ngono balauli ibabo banobalaula ne masimba.

Koga ngakusijalo mumuli. Ha kuli kuti kuna mmwe unohaka be nkulu pa bamwe mumuli, ngaabe n’hingili wenyu,

na iyebo unohaka be mbeli, ngaabe nlanda wa bose.

Nkololo we Nhu naiye aazohha kuwohingigwa, koga wakahha kuwohingila ne fa efila sungunugwa kwe banhu bali banji.”

Ndizo bakaswika ku Jeriko. Jesu kati ebhuda mu Jeriko ana badiyiwa babe ne mbunga we banhu nkulu, Bhatimeo, nkumbili we bhofu, ali nkololo wa Timeo, kabe ali gele pa whunde ye zila.

Ngono kati ewha kuyi ndi Jesu we Nazareta, katangisa milidza whi edana eti, “Jesu Nkololo wa Dafite! Undiwhile ngoni!”

Koga banji bakantjemela beti, anyalale, koga kamilidzila whi pehhugwi kadana eti, “Nkololo wa Dafite undiwhile ngoni!”

Jesu kama kati, “Mun'dane.” Ndizo bakadana nlume we bhofu bakati kuunli, “Simisamoyo, umilike, unokudana.”

Kalaha ngubo yaakabe akafuka, kamilika kayenda kuna Jesu.

Jesu kambhuzwa kati, “Unohaka kuti ndikuyitileni?” Bhofu likan’handula likati, “N'diyi, ndohaka kuti ndipofunuke.”

Jesu kati kuunli, “Yenda, ngobe galamoyo kuko kwakupodza.” Tjinyolotjo kapofunuka, ngono katobela Jesu.