New Testament

Jesu katangisa lebeleka nabo ne zwifaniso eti, “Mmwe nlume wakati kathama nnda we mihhambi, kauhohela, katsha gomba linokobolegwa hhambi pakati kwawo, kabaka thungamakole muunli, kawusayidza bamwe balimi, ngono iye kayenda ku imwe hango.

Kwakati gwabe lubaka gwe hhambi, katuma nlanda uwe kuti anontolela dzimwe hambi dzabva mu nnda we mihhambi.

Bakatola nlanda bakanloba, bakan’handusa akalembedza maboko.

Mweni we nnda kapamha katuma mmwe nlanda, ngono na iyebo bakaswika bakamphobola mu n’holo, bakanthama zwinhu zwinombhatisa honi.

Kabuya katumila mmwe nlanda kakale, bakaswika bembulaya, bakathama bejalo mu bamwe banjinji bakatumwa hule kukwe bakabaloba, bamwe bakababulaya.

Ngono wakabe atjisaligwa ne nkololo uwe waakabe eda kwazo. Gwe bupelo katuma iye, ezwibva eti, ‘Banowoteta nkololo wangu.’

Koga balimi ibabo be nnda bakalebeleka tje kwabo bakati, ‘Oyu ndiye n'gali we nhaka, ngatimbulayeni, kuti ndizo nhaka ibe yedu.’

Bakambhata, bakambulaya, bakanlahila kuhhe kwe nnda we mihhambi.

“Mweni we nnda unowothama etini kene? Unowobuya kawolobesa balimi ibabo, ngono unowosayidza nnda iwoyo we mihhambi kuna bapoga.

Amuzobala matama amu whalo dze Ndzimu anoti, ‘Bgwe lakalambiwa ne babaki, ndilo lakabe bgwe linotambunudza mbako;

ikoku kwakayitiwa ndi He, ngono kotjenamisa mu meho edu?’”

Batungamili be Bajuta bakahaka zila yabangansunga ndiyo, ngobe bakabe babona kuti unobva ibo, koga bakahla mbunga we banhu. Ndizo bakansiya bakayenda.

Batungamili be Bajuta bakantumila Bafarisi bamwe ne batobeli ba Herode kuti bambhatshile mu ndebo dzidze.

Bakahha bakambva bakati, “N'diyi, toziba kuti muna malebeswa, amuna hanya kuti nnhu ndiani, ne kuti amutolinga mamo e banhu, koga ne malebeswa modiya zila ye Ndzimu. Apa kwakafanila kuti tilipe lukhetho kuna Khaisara kene tisilipe?”

Tigulipe kene tisigulipe? Koga Jesu kaziba butjengedzi gwabo, ngono kababva kati, “Apa ini mundilika kene? Hhisani ngeno loso ling'ompela ndibone.”

Ngono bakalihhisa. Kababva kati, “Tjifano tjaani itjetji ne zina nde laani?” Bakan’handula bakati, “Nde zwa Khaisara.”

Jesu kababva kati, “Ipani Khaisara zwinhu zwa Khaisara, mupe Ndzimu zwinhu zwe Ndzimu.” Bakankaabalila.

Basadusi, ibo banhu bakabe beti akutomukiwa mu bafi, bakahha kuna Jesu. Ngono bakambhuzwa bakati,

“N'diyi, Mushe wakatikwalila eti, ‘Ha nlume angafa esiya nkadzi asina bana, nnung'una we nfi wakafanila n'galanhaka, kuti anthamile bana.’

Kwakabe kuna bamwe balume bakazwagwa bali kutendeka, bali bana be nhu. Whola katola nkadzi, ngono kafa ensiya asina mwana.

Nnung'una uwe kan'galanhaka, ngono na iyebo kafa asina mwana naye ne we butatubo katobela.

Bose bali kutendeka bakahaya mwana wabasiya. Bhelelo nkadzi kafabo.

Mu kumuka kwe bafi, unowobe nkadzi waupi? Ne kuti bose bali kutendeka bakabe bakanlobola.”

Jesu kati kubali, “Apa saziba whalo kene simba le Ndzimu kwenyu ate iko kunomulaha kene?

Ne kuti ha bemuka mu bafi abatolobola, kakale abatolobogwa, koga banowobe benga batumwa be kudzimu.

Koga nekwe muka kwe bafi, apa amuzobala kene mu lukwalo gwa Mushe panolebgwa nekwe denje, kuti Ndzimu wakabva Mushe ukati, ‘Ndimi Ndzimu wa Abhurahama, ndimi Ndzimu wa Isaki, ndimi Ndzimu wa Jakubo kene?’

Ate Ndzimu we bafi, koga Ndzimu we batjili. Mose moleyanya.”

Mmwe we Badiyi be nlayo kati esedzela pedlo, kabawha benyanyayidzana, ngono kati ewha kuti Jesu wadabila zubuyanana, kambhuzwa kati, “Ndiupi nlayo nkulu pa imwe?”

Jesu kadabila kati, “Nlayo nkulu pa imwe ndi whoyu, ‘Whililani imwi Baiziraela, He Ndzimu wedu, He bang'ompela.

Ida He Ndzimu uwo ne moyo uwo wose nenge meya iyo yose nenge nkumbulo uwo wose nenge masimba awo wose.’

Nlayo nkulu kutobeledza ndiwhoyu, ‘Ida mmwe nhu sekwa unozwida.’ Akuna mmwe nlayo unopinda iyeyi.”

N'diyi we nlayo kabva Jesu kati, “Molebesa tjose, N'diyi. Malebesa kuti Ndzimu nng'ompela, ngono akuna mmwe Ndzimu kuhhe kwa iwo woga.

Ngono kuti tiwude ne moyo wose nenge njalakang'wa dzose nenge masimba wose nenge kuda mmwe nhu sekwa unozwida, ikoku kopinda zwipo zose zwinopisiwa ne zwimwe zwibhayilo.”

Jesu kati ewha N'diyi we nlayo an'dabila ne butjenjebvu, kambva kati, “Aute uli kule kule ne buhe gwe Ndzimu.” Kubva ipapo akuna mmwe wakatongo haka kumbhuzwa mbhuzo kene ili yakatini.

Jesu kati ediya mu Ng'umba ye Ndzimu kati, “Ini badiyi be nlayo beti Mesiya unkololo wa Dafite kene?

Dafite ne kukwe wakati elaugwa ne Meya yakayengemala, kalebeleka kati, ‘He bakati kuna He wangu, gala ku luboko gwangu gwe ludli kudzina ndibiga zwita zwizo pasi kwe makumbo awo.’

Apa Dafite ungati en'dana eti ‘He,’ ungabe nkololo uwe tjini kene?” Bunjinji gwe banhu bakabe bakan’whilila gukahanhisiwa ne ndebo iye.

Mu zwidiyo zwizwe wakalebeleka eti, “Muzwitjengete mu badiyi be nlayo, banoda ambala hazu ndefu ndefu ne lezwiwa ku matengeselo.

Banoda magalo mabuyanana mu ng'umba ye ntembezelo ne da bugalo gwe mamo ha kuli mu mizano ye zodliwa.

Banotjebela tjilikadzi, bezwiyedza banhu bakalulwama ne mitembezelo yabo milefu. Hamu yabo inowobe whulu.”

Jesu kagala kulingisana ne panodusigwa zwipo zwe mari, kalingilila banhu banjinji belonga mari abo panolongwa zwipo mu Ng'umba ye Ndzimu. Bafumi banjinji bakalonga mari njinji.

Kukahha n’hayi we tjilikadzi kalonga mari mbili dze themba nhukununu tjose.

Ipapo Jesu kadana badiyiwa babe kababva kati, “Ndolebesa nditi, iyeyi tjilikadzi isina tjayo, yadusa kupinda bose.

Bamwe bawungunula mu fumwa yabo, koga iye nenguba ali n’hayi, wadusa kose kwaanako mu butjilo gugwe.”