New Testament

Nzano we Pinda Pehhugwi ne Nzano we Tjiwunga tjisina Mbidzo, wakabe wasaligwa ne mahhuba mabili koga. Ngono Baphirisiti bakulu ne badiyi be nlayo bakabe behaka zila ya bangabhata Jesu nekwa kasumbikala, kuti bambulaye.

Koga bakati, “Kusi ne lubaka gwe nzano, ngobe kungabe ne hhoba pakati kwe banhu.”

Kati ali mu Bhetani, ali gele edla mu ng'umba ya Simoni wakatongobe ne mapele, kukahha nkadzi akasenga tjiteme tje alabhasita tje mafuta anonuwhilila zwinozipa, e nadi mbuyanana, ana ntengo upehhugwi kwazo, kazwinunula tjiteme, kadila mafuta mu n’holo wa Jesu.

Koga bammwe ipapo bakabe belebesana ne buhongola beti, “Apa mafuta iyawa anozanisigwani kene?

Abe angatengesiwa, kukawanika mari anopinda mari e siliva ali mazana matatu (300), kapiwa bahayi.” Ndizo bakantjemela.

Koga Jesu kababva kati, “Thubukanani naye. Apa mon'dziyidzilani kene? Kana wandiyitila tjinhu tjikulu kulu kwazo.

Bahayi munabo misi yose, mungabayitila bubuya pamada, koga imi amutowobe nami misi yose.

Iwhoyu nkadzi wayita tjaangatubula, wadila mbili wangu mafuta, eululwamisila biganyiwa.

Ndolebesa ndoti kumuli, kumwe ne kumwe kunowosumikigwa Ndebo mbuya iyeyi mu hango yose, tjahingwa ne nkadzi iwhoyu tjowolebgwabo, kuti libe gumbuludzo ne kukwe.”

Ipapo Judasi Isikariyoti, mmwe we bali gumi lina babili, kayenda ku Bapirisiti bakulu kuti abawongele Jesu.

Ngono bakati bewha ikoku bakahanha, bakan'gadzabgwe kuti banowompa mari. Kubva ipapo wakatangisa haka lubaka gwakalulwama gwe tengesa Jesu.

Mu hhuba le kutanga le Nzano we Tjiwunga Tjisina Mbidzo, be bhaya mwhizana ye tjibhayilo tje Pinda Pehhugwi, badiyiwa babe bakati kuunli, “Ndi poni kwamunohaka kuti tinomululwamisila dlila Nzano we Pinda Pehhugwi?”

Ngono Jesu katuma badiyiwa babe bali babili kati, “Nginani mu nzi nkulu, ngono mowohangana ne nlume akasenga habana ye vula, muntobele.

Mubve mweni we ng'umba yaanowongina muti, ‘N'diyi bakati ng'umba yangu ye bezi yandinowodlila Nzano we Pinda Pehhugwi ne badiyiwa bangu ndi ipi?’

Unowomulakidza ng'umba whulu itjapehhugwi kwe imwe, yakalongwa zwigalo ikalulwamisiwa, mutilulwamisile ipapo.”

Badiyiwa ibabo bakamilika bakayenda ku nzi nkulu, bakanowana tjimwe ne tjimwe tjili sekwa aleba, ndizo bakalulwamisa.

Kwakati madekwana Jesu kaswika ne bali gumi lina babili.

Bakati bali pa tafuli bedla, Jesu kati kubali, “Ndolebesa ndoti, mmwe wenyu unowondiwonga, iye unodla nami.”

Bakatangisa ngina buyendasi, ngono ne kutobedzana bakati, “Apa ndimi kene?”

Jesu kababva kati, “Mmwe we bali gumi lina babili, iye unoseba tjiwunga tjitje mu ndilo nami.

Iye Nkololo we Nhu unowofa sekwa kwakakwagwa ne kukwe, koga wapalala iwoyo nlume unowonga Nkololo we Nhu! Kwabe kungayita ha nlume iwoyo akabe asagala azwagwa.”

Bakati bedla, Jesu katola tjiwunga, kaboka Ndzimu, katjipemula kabapa, kati kubali, “Tolani, umbili wangu iwoyu.”

Katola bhepe le nkumbi we n’hhambi kati aboka kabapa iwo, bakaung'wa bose.

Kati kubali, “Awa malopa angu anothama tjibvumano tjitshwa, iwo anotebuligwa banji.

Ndolebesa ndoti kumuli, anditowong'wa kakale nkumbi we ntjelo iwoyu we n’hhambi kuswikila hhuba landinowoung'wa uli ntshwa mu buhe gwe Ndzimu.”

Bakati bamba lumbo gunokudza Ndzimu, bakabhuda bakayenda ku Dombo le Mitoba.

Jesu kababva kati, “Mowondipalala mose, ngobe kwakakwagwa kukayi, ‘Ndowoloba nlisi, ngono mwhizi dzowopalala.’

Koga ha ndisinobe ndamusiwa mu bafi, ndowomutungamilila ku Galili.”

Pita kambva kati, “Nenguba bangapalala bose, imi andingamusiye.”

Ngono Jesu kambva kati, “Ndolebesa ndoti, busiku igogu, gukurume lowoti lisanhu likalila kabili, unowobe wandizwilandula katatu.”

Pita kan'dabila akasimisa eti, “Imi andingamuzwilandule, bukulu ndingafa namwi.” Bose bakaleba sa ikoko.

Bakayenda panhu panodang'wa Getsemane, kati ku badiyiwa, “Galani ipapa nditjatembezela.”

Katola Pita na Jakubo na Johani, kayenda nabo, kangina buyendasi, kadziyidzika kwazo mu meya,

kati kubali, “Meya yangu ihhele buyendasi kukulu kwandingafa. Salani pano makalinda.”

Kayenda nhambgwana, kawila pasi katembezela ekumbila kuti, ha kutubuka dzene igogu lubaka gungampinda.

Kati, “Tate bangu, akuna tjinomukona, dusani bhepe ileli le dziyidzika pandili, nenguba kwakajalo, musiyite da kwangu, itani da kwenyu.”

Kati ebuya kawana bakayizela, kati kuna Pita, “Simoni, apa wakayizela kene? Nokong'wa linda awara ing'ompela koga kene?

Lindani mutembezele kuti ndizo musingine mu kulikiwa. Meya inoda tjose, koga nyama inokong'wa.”

Kabgwilila kanotembezela kakale eleba matama iwo zwawo.

Kabuya kakale ewana bakayizela, ngobe meho abo akabe elema ne whope. Ngono bakasizibe kuti bangan'dabila betini.

Kabuya gwe butatu, ngono kababva kati, “Apa mutjakayizela, munyaluluka zwenyu kene? Kwagala, gwabe lubaka, Nkololo we Nhu unowongegwa mu maboko e batjinyi.

Mukani, ngatiyendeni, ngobe n'wongi wangu wabe pedlo.”

Ipapo koga atjalebeleka, Judasi, iye mmwe we bali gumi lina babili, kahha ana mbunga we banhu bakasenga makanu ne swimbo, bebva ku Baphirisiti ne badiyi be nlayo ne bakulu.

Ntengesi wakabe abapa tjilakidzo eti, “Iye wandinowoputa, ndiye, munsunge, muyende naye akalisiwa.”

Kati ehha kayenda kunuli tjinyolotjo, kati eswika pana Jesu kambva kati, “N'diyi wangu,” kabe emputa.

Bakambhata bakansunga.

Mmwe we bakabe bali ipapo kahomola bukanu gugwe, katema mmwe nlanda we Ntungamili we Baphirisiti, kanthubula zebe.

Ngono Jesu kababhuzwa kati, “Apa mahha kuwogwisa tjigebeng'a kene, kwamunohha makabhata makanu ne swimbo kuwonditola?

Hhuba ne hhuba ndakabe ndi namwi mu Ng'umba ye Ndzimu ndidiya, ngono amuzotongo ndibhata. Koga matama e whalo dze Ndzimu ngaahhadzisike.”

Badiyiwa babe bose bakamfupatila bakatihha.

Ngono mmwe n’huhha kantobela akafuka ngubo yoga, na iye bakambhata,

kasiya ngubo iye katihha ali mbudlo.

Bakatola Jesu bakayenda naye ku Ntungamili we Baphirisiti. Baphirisiti bakulu bose ne bakulu ne badiyi be nlayo bakabe bakakubungana.

Pita wakabe akantobela ali nhambgwana naye kunoti mu n’ha we Ntungamili we Baphirisiti, ngono kagala ne balindi edziya moto.

Ne lubaka igogo, Baphirisiti ne makulukota wose bakahaka butendeki gungasungisa Jesu, kuti abulawe, koga bakasiguwane.

Banji bakadusa butendeki gwe manyepkhwa ne kukwe, koga gwakabe gusingayendidzane.

Bamwe bakamilika bepa butendeki gwe manyepkhwa ne kukwe beti,

“Takawha eti, ‘Ndowokolomodza ng'umba iyeyi ye Ndzimu yakabumbiwa ne maboko, koga mu mahhuba matatu ndowobaka imwe isakathamiwa ne maboko.’”

Nenguba kwakajalo, butendeki gwabo gwakabe gusingawililane.

Ntungamili we Baphirisiti kama pakati kwe banhu, kabhuzwa Jesu eti, “Apa autodabila batendeki ibaba tjabanoleba nekuko kene?”

Jesu kanyalala, kasidabile tjimwe. Ntungamili we Bapirisiti kambhuzwa kakale kati, “Apa ndiwe Mesiya, Nkololo we Ndzimu unokudziwa kene?”

Jesu kati, “Ndimi. Ngono Nkololo we Nhu mowombona ali gele ku luboko gwe ludli gwe Ndzimu Masimbawose, ehha nge makole e kudzimu.”

Ntungamili we Baphirisiti kapalula zwiambalo zwizwe kati, “Titjahakilani batendeki kene?

Mazwiwhila iye etuka Ndzimu. Moipedza tjini?” Ngono bose bakantilika nlandu we kuti wakafanigwa ne lufu.

Bamwe bakatangisa kunmpfila mate bakanzwimba meho benloba, bembva beti, “Leba kuti ndiani wakuloba.” Balindi bakantibulanya.

Pita kati atjigele pasi mu n’ha, kukabe kuhha mmwe we balandakadzi be Ntungamili we Baphirisiti;

ngono kati ebona Pita edziya moto, kanlinga kambva kati, “Nawebo wabe una Nnazareta iwoyu, iye Jesu.”

Pita kalandula kati, “Anditoziba naiko anditowhisisa kuti unoleba nekweni.” Kamilika kayenda ku nkoba.

Nlandakadzi kambona kakale, kabva banhu bakabe bali pedlo naye kati, “Iwoyu nlume mmwe wabo.”

Pita kalandula kakale. Kukati hule kwe lubaka gufutshwanana, banhu bakabe bali mile ipapo bakati kuna Pita, “Malebeswa, u mmwe wabo, ngobe u N'galili.”

Pita katangisa tuna ne kuzwilonga bhiso kati, “Iwoyu nlume wamunoleba ne kukwe anditonziba.”

Ipapo gukurume likalila gwe bubili, Pita kakumbula matama akabe alebgwa ndi Jesu eti, “Gukurume lowoti lisanhu likalila kabili, unowobe wandizwilandula katatu.” Pita kadila guwo.