New Testament

Ipapo Jesu kababva kati, “Ndolebesa ndoti, bayapo bamile ipapa banowobona buhe gwe Ndzimu gohha ne masimba, basanhu bakafa.”

Hule kwe mahhuba ali matanhatu, Jesu kadana Pita na Jakubo na Johani, katanha nabo dombo lefu lefu pasina nhu, ngono kahanduka mbumbiko mbeli kwabo.

Zwiambalo zwizwe zwikangadzima, zwili zwitjena kwazo, kusina nsuki ungazwitjenesa sa ikoko mu hango.

Elija na Mushe bakahha bakalebeleka na Jesu.

Pita kati kuna Jesu, “N'diyi, kwaka naka kwazo kuti tibe tilipano. Dzene tingabaka mihaha mitatu, mmwe uli wenyu, mmwe uli wa Mushe, mmwe uli wa Elija.”

Wakabe eleba ikoku, ngobe wakabe asingazibe kuti ungalebani, ngoti bakabe bapalukamoyo kwazo.

Kukati ipapo gole likabafukidza, ngono whi likalebeleka libva mu gole liti, “Oyu ndiye Nkololo wangu unodika, mun’whilile.”

Tjinyolotjo bakati belinganya, bakasitjabone mmwe anabo, kuhhe kwa Jesu ega.

Kukati bedeluka mu dombo, Jesu kabalaya akasimisa kuti kuhaye wababudza tjababona, kudzina iye Nkololo we Nhu emusiwa mu bafi.

Ndizo kukasibe ne wababudza, koga bebhuzwana beti, “Muka mu bafi kolebani.”

Bakambhuzwa bakati, “Ini Badiyi be nlayo beti Elija wakafanilo hha kutanga?”

Ngono kati kubali, “Elija unohha kutanga kuwolulwamisa zwinhu zose, ngono ini kwakakwagwa nekwe Nkololo we Nhu kuyi unowodziyidzika kalengudziwa?

Koga ndomubva nditi, Elija wakahha, ngono bakathama tjimwe ne tjimwe tjabada muunli sekwa kwakakwagwa.”

Bakati beswika ku bamwe badiyiwa, bakawana kuna mbunga we banhu ne Badiyi be nlayo benyanyayidzana ne badiyiwa ba Jesu.

Ipapo mbunga wose ukati ubona Jesu ukatjenama kwazo, ndizo ukantihhilila ukambuyisa.

Jesu kabhuzwa badiyiwa babe kati, “Molebani nabo?”

Mmwe nhu mu mbunga kan’handula eti, “N'diyi, ndahhisa nkololo wangu kumuli, ngobe una meya inonkonedza lebeleka.

Ha yammukila inonlahila pasi esiza mafulo etafuna meno ne mbili uwe uwomelela wose. Ngono ndakumbila badiyiwa benyu kuti baiduse, koga bakong'wa.”

Jesu kababva kati, “Tjizekugwana tjisina kugalamoyo ndimwi, ndowobe namwi lubaka gungapani kene? Ndowobe ne moyonlefu namwi kuswikila lini kene? Mun’hhise kundili.”

Bakayisa mbisana kuna Jesu, ngono meya ikati ibona Jesu ikadzipikanya mbisana iwoyo ikanligila pasi, kabumbuluka esiza mafulo.

Jesu kabhuzwa tate be mbisana kati, “Gwala ikoku kwakantangisa lini?” Bakan’handula beti, “Kubvila mu butukununu.

Ndikanjinji inligila mu moto nenge mu vula ihaka kumbulaya, koga ha mutubula thama tjimwe, mutiwhile ngoni mutibhatshe.”

Jesu kati kuunli, “Ukati, ha mutubula? Zwinhu zose zotubuka mu nhu unogalamoyo.”

Ipapo tate be mbisana bakalebeleka bakati, “Ndogalamoyo, ngono bhatshani kusagalamoyo kwangu.”

Jesu kati ebona banhu behha bakalabuka bose katjemela meya mbi kati, “Meya we mbebebe ne bhubulazebe ndiwe, bhuda muunli, usitongo buya ukabgwilila muunli kakale.”

Meya ikatjema ikazunguza mbisana iwoyo kwazo, ikabhuda muunli, kasala enga tjidumbu, bunji gwabo gukati, “Wafa.”

Koga Jesu kambhata ne luboko kammilidza, kamuka kama nge makumbo.

Jesu kangina mu ng'umba, ngono badiyiwa babe bakambhuzwa bali boga beti, “Ini iswi takong'wa dusa meya iyeyi?”

Ngono kati, “Inonga iyeyi inodusiwa koga nge ntembezelo.”

Kubva ipapo bakayendila mbeli bakapalama Galili. Jesu wakabe asingahake kuti kuzibgwe kwaayako.

Ngoti wakabe ediya badiyiwa babe eti kubali, “Iye Nkololo we Nhu unowobhakhwa kalongwa mu maboko e banhu, ngono banowombulaya, koga unowoti abulawa, hule kwe mahhuba matatu unowomuka.”

Koga bakabe basingawhisise ndebo iyeyi, ngono bakahla kumbhuzwisisa.

Bakaswika ku Kapenaume, ngono kati ali mu ng'umba kababhuzwa kati, “Mabe mulebeleka nekweni mu zila?”

Koga bakanyalala, ngoti bakabe bati mu zila bakalebeleka nekwe kuti, nkulu tjose ndiani?

Ndizo Jesu kagala pasi, kabadana bali gumi lina babili kababva kati, “Ha kuli kuti kuna unowobe nkulu, ngaabe iye ntukununu muna bose, kakale abe nlanda wa bose.”

Katola mwana ntukununu kambiga pakati kwabo, ngono kati entola engumbatila ne maboko kababva kati,

“Iye unoamutjila mwana unonga iwoyu ne zina langu, unoamutjila imi, ngono na iye unoamutjila imi, aatoamutjila imi koga, ngono unoamutjila iye wakandituma.”

Johani kambva kati, “N'diyi, takabona mmwe nlume edusa meya mibi ne zina lenyu, tikan'dzibila, ngobe wakabe asi mmwe wedu.”

Koga Jesu kati, “Musin'dzibile, ngoti akuna unohinga n’hingo unolakidza simba ne zina langu ungatubula kuti, tjinyolotjo kubvapo kaleba bubi ne kwangu.

Iye usingalambane naswi nde wedu.

Ndolebesa ndoti kumuli, iye unomupa nkombe we vula kuti mung'we, ngobe mudang'wa ne zina la Khirisiti, aangalahikigwe ne mbhayilo uwe.

“Koga iye unothama mmwe wa ibaba batukununu banogalamoyo mundili kuti bathame tjibi, koyita ha angasungiligwa gwiyo gulu mu ntshibha kalahigwa mu gungwa.

Ndizo ha luboko gugo gukuyita kuti utjinye, uguthubule. Koyita ha ungangina mu butjilo gusingapele uli tjilema, pana kuti ube ne maboko wose koga ube ulahigwa mu moto unongunguma.

Gumbo lilo ha likuyita kuti utjinye, ulithubule. Koyita ha ungangina mu butjilo uli tjilema, pana kuti ube una makumbo mabili, ngono uposegwe mu moto usingadzime.

Kakale ha hhiho lilo likuyita kuti utjinye, ulikonyombole uliduse, ngobe koyita ha ungangina mu buhe gwe Ndzimu una hhiho ling'ompela, pana kuti ube ne meho mabili ulahigwe mu moto usingadzime.

‘Iko kuna whonyana dzisingafe ne moto usingadzimwe.’

“Mmwe ne mmwe unowotjenesiwa ne moto, se munyu utjenesa tjibhayilo.

“Munyu wakalulwama, koga ha wahuluka, ungathamwa tjini kuti ube ne ndlo kakale kene? “Ibeni ne munyu, mube ne mbakiso pakati kwenyu.”