New Testament

Mu lubaka igogo Jesu kapalama minda mu hhuba le Sabatha. Badiyiwa babe bakabe bana hhala ndizo bakatangisa mwaula zwiyako mu nnda kuti badle.

Bafarisi bakati bebona ikoku bakati kuunli, “Bona! Badiyiwa babo banothama tjisi mu nlayo ne hhuba le Sabatha.”

Kati kubali, “Amuzobala kuti Dafite ne baakabe anabo bakati bakathamani bana hhala kene?

Wakangina mu Ng'umba ye Ndzimu, ngono iye ne baakabe anabo bakadla zwiwunga zwinopiwa Ndzimu, koga ne nlayo zwakabe zwili zwiwunga zwe Baphirisiti koga.

Amuzobala mu nlayo kuti mu hhuba le Sabatha Baphirisiti banohinga mu Ng'umba ye Ndzimu banotjuluka nlayo we hhuba le Sabatha, koga bakabe basina nlandu kene?

Ndomubudza kuti iye nkulu pa Ng'umba ye Ndzimu upano.

Ha mabe makaziba kuti matama iyawa anobvani anoti, ‘Ndohaka mawhilo zogwadza, kusi tjibhayilo,’ mobe musakabona nlandu basina nlandu.

Ngobe Nkololo we Nhu ndi He we Sabatha.”

Wakayendila mbeli kubva ipapo, ngono kangina mu ng'umba yabo ye mitembezelo.

Ipapo kwakabe kuna nlume una luboko gwakawhewhana. Kwakabe kuna banhu bakabe behaka tjimwe tjabangabona Jesu nlandu nditjo, ngono bakabhuzwa Jesu bakati, “Apa kumu nlayo podza ne hhuba le Sabatha kene?”

Kati kubali, “Apa ndiupi wenyu ungati ana mwhizi ing'ompela yawila mu gomba ne Sabatha, kasiyiduse kene?

Ngono nhu iye unopinda mwhizi kungapani kene! Ndizo kumu nlayo kuyita ndulamo ne hhuba le Sabatha.”

Ipapo kati ku nlume iwoyo, “Tambunudza luboko gugo.” Ndizo nlume iwoyo kagutambunudza gukapola tjose gukafanana ne gumwe.

Koga Bafarisi bakabhuda bakanolangana sekwa bangabulaya Jesu.

Jesu wakabe abona tjabanohaka thama ngono, kabhuda mu magalo iyawo. Banjinji bakantobela, ngono kabapodza bose,

kakowomedza kuti bahaye wababudza kuti ndiye ani.

Oku kwakabe kuli kuti kuhingikale matama akalebgwa ne nlebesambeli Isaya eti,

“Whoyu nlanda wangu wandakahalula, iye wandinoda, wandinohanha muunli. Ndowodelusila Meya yangu muunli, ngono unowozibisa ne kwe ndulamo muna Bezwitjaba.

Aatokakabadzana ne nhu kene kulonga hhoba, akuna unowowha whi lile mu dzizila.

Luhanga gwakakombama aatoguvuna, ne luvone gunopfungayila aatowogudzima, kudzina etungamilila ndulamo mu kukunda.

Bezwitjaba banowogalabgwe muunli.”

Ipapo bakahhisa kuunli nlume wakabe akasungwa ne meya mbi ali bhofu kakale ali mbebebe, ngono Jesu kampodza, ndizo kalebeleka kakale kabona.

Banhu bose bakatjenama kwazo bakati, “Apa ungabe ali Nkololo wa Dafite iwoyu kene?”

Ngono Bafarisi bakati bewha ikoku bakati, “Nlume iwoyu unotata meya mibi ndi Bheelizebhuli koga, iye he we meya mibi.”

Jesu nekuziba mikumbulo yabo kati kubali, “Buhe gumwe ne gumwe gwakazwithubukanya gowokolomoka, kakale akuna nzi kene n’ha wakazwithubukanya unowobakika.

Satani ha etata Satani, wakathubukana ne kukwe, buhe gugwe gungasima tjini kene?

Ngono ha kuli kuti ndodusa meya mibi na Bheelizebhuli, bakololo benyu ibo banoidusa nayani? Ndizoke, banowobe basumikilisi benyu.

Koga ha kuli kuti ndodusa meya mibi ne Meya ye Ndzimu, ipapo buhe gwe Ndzimu gwatjiswika mumuli.

“Kene, apa nhu ungangina mu ng'umba ye nlume wakasima tjini katapa thundu iye asasunga iwoyo nlume wakasima kutanga? Ipapo ekotapa ng'umba iye.

“Iye usimile nami unonyanyayidzana nami, na iye usingakubunganye nami, unopaladza.

Ndizo ndomubudza nditi, jinyo limwe ne limwe ne kutuka Ndzimu kwe banhu kowozwiibhatigwa, koga tuka Meya yakayengemala aatokuzwiibhatigwa.

Iye unonyanyayidza Nkololo we Nhu, unowozwiibhatigwa, koga iye unonyanyayidza Meya yakayengemala aatowozwiibhatigwa, mu misi ino kene mu misi inohha.

“Itani kuti nti ululwame, ngono zwizwalo zwawo zowolulwamabo, kene itani nti kuti uyipe zwizwalo zwawo zwoyipabo, ngobe nti unozibgwa ne zwizwalo zwawo.

Bana be nyoka ndimwi! Mungati muli babi mukaleba tjakalulwama tjini? Nlomo unoleba tjihhele mu moyo.

Nhu wakalulwama unodusa bubuya mu fumwa iye yakanaka ne nhu wakayipa unodusa bubi mu fumwa iye yakabipa.

“Koga ndomubudza nditi, banhu banowobe ne kuzwidabiligwa mu hhuba le kusumikilisiwa mu dama limwe ne limwe le butjapa labakaleba.

Ngobe mowolulwamisiwa ne matama enyu kakale mukabong'wa nlandu ne matama enyu.”

Ipapo bamwe be Bafarisi ne badiyi be nlayo bakati kuunli, “N'diyi, tohaka bona tjilakidzo tjinobva kumuli.”

Jesu kabadabila kati, “Banhu ndimwi bangwenu babiibi kakale musingagagwebgwe ne Ndzimu mohaka tjilakidzo, ngono akuna tjilakidzo tjamunowopiwa kuhhe kwe tjilakidzo tje nlebesambeli Jona.

Koga sa Jona akabe mu ntumbu we whobe whulu mahhuba matatu ne masiku matatu, sa ikoko Nkololo we Nhu unowobe mu kumbu mahhuba matatu ne masiku matatu.

Balume be Ninive banowomuka ne banhu ibaba bangwenu mu nsi we kusumikilisiwa, bakababona nlandu, ngobe ibo bakahandukila matjinyo abo pa kusumikila kwa Jona, ngono ngwenu bonani, iye nkulu pana Jona upano.

Nfumakadzi we burwa unowoma ne banhu ibaba bangwenu mu hhuba le kusumikilisiwa, ngono kababona nlandu, ngobe wakahha ebva ku phelelo dze hango kuwowhilila butjenjebvu gwa Solomoni, ngono bonani, iye nkulu pana Solomoni upano.

“Ha meya mbi ibhuda mu nhu, inopinda mu magalo akawoma ihaka kunyaluluka, koga isingakuwane.

Ipapo inoti, ‘Ndowobgwilila ku ng'umba yangu yandakabva muili.’ Ha iswika, inowana ng'umba iyeyo isina mmwe umuili, yakatshwayigwa, kakale yakabiganyika.

Ipapo inowoyenda ikanotola meya imwe ili kutendeka mibi kuipinda, ngono ibe ingina igala mukati. Ngono tjimo tje nhu iwoyo tje bupelo tjokoyipa kupinda tje kutanga. Ndiko sekwa kunowobe iko ne banhu bangwenu bakayipa.”

Jesu kati atjalebeleka ne banhu, mmeyabe ne banung'una babe bakama kuhhe, bekumbila lebeleka naye.

Mmwe kabudza Jesu kati, “Mmeyabo ne banung'una babo bamile pahhe banokumbila lebeleka nawe.”

Kadabila nlume wambudza kati, “Mmeyangu ndiani ne banung'una bangu ndiboani?”

Katendeka badiyiwa babe ngono kati, “Aba ndibo mmeyangu ne banung'una bangu.

Iye unohinga kuda kwa Tate bangu ba kudzimu ndiye nnung'una wangu ne hazwadzi yangu na mmeyangu.”