New Testament

Jesu kati aleba zwinhu zose izwezwi, kabva badiyiwa babe kati,

“Sekwa munoziba kuti Nzano we Pinda Pehhugwi wasaligwa ne mahhuba mabili, ngono Nkololo we Nhu unowolongwa mu maboko a ibabo banowombambula.”

Ipapo Baphirisiti bakulu ne bakulu be Bajuta bakakubungana mu magalo e Ntungamili we Baphirisiti wakabe edang'wa Kaifasi,

ngono bakalangana sunga Jesu ne kwakasumbikala kuti bambulaye.

Koga bakati, “Kusi pakati kwe nzano, ngobe kungamuka hhoba pakati kwe banhu.”

Jesu kati ali mu Bhetani mu ng'umba ya Simoni wakatongo gwala mapele,

mmwe nkadzi kahha kuunli ana tjilongo tjakathamiwa ne bgwe linoyi alabhasita tjina mafuta e themba ipehhugwi kaatebulila mu n’holo wa Jesu ali gele pa tafuli edla.

Badiyiwa bakati bebona ikoko bakagwadzamoyo, ngono bakabhuzwa beti, “Mafuta anozanisigwani iyawa?

Mafuta iyawa abe angatengesiwa ne themba ipehhugwi kwazo, ngono mari kapiwa bahayi.”

Jesu kati aziba ikoku, kati kubali, “Ini mudziyidza nkadzi iwoyu? Wahinga tjinhu tjakanaka mundili.

Bahayi munabo misi yose, koga imi amutowobe nami misi yose.

Dila mafuta iyawa mu mbili wangu, wakuhinga kundilulwamisila mbiganyo yangu.

Ndolebesa ndoti kumuli, kumwe ne kumwe kunowosumikigwa Ndebo Mbuya iyeyi mu hango yose, tjahingwa ne nkadzi iwoyu tjowolebgwabo, kuti libe gumbuludzo ne kukwe.”

Ipapo mmwe we bali gumi lina babili, wakabe edang'wa Judasi Isikariyoti, kayenda ku Baphirisiti bakulu ngono

kabhuzwa eti, “Mowondipani ha ndingamupa iye?” Ndizo bakanlipa mari e siliva ali makumi matatu.

Kubva ipapo tjose Judasi kahaka lubaka gwaangabapa Jesu ndigo.

Mu hhuba le kutanga le Nzano we Tjiwunga tjisina mbidzo badiyiwa bakahha kuna Jesu bakambhuzwa beti, “Mohaka kuti timululwamisile poni kudlila zodliwa zwe Nzano we Pinda Pehhugwi?”

Kahandula eti, “Yendani mungine mu nzi nkulu, mowoswika ku mmwe nlume, mumbudze muti, ‘N'diyi bakati, lubaka gwangu gwasedzela. Ndowodlila zodliwa zwe Nzano we Pinda Pehhugwi ne badiyiwa bangu ku ng'umba iyo.’”

Ndizo badiyiwa bakahinga sekwa balayigwa ndi Jesu, bakalulwamisa zodliwa zwe Pinda Pehhugwi.

Kukati madekwana, Jesu kagala pa tafuli edla ana badiyiwa bali gumi lina babili.

Bakati bedla kati kubali, “Ndolebesa ndoti, mmwe wenyu unowondiwonga.”

Bakahhala buyendasi, ngono mmwe ne mmwe wabo kati kuunli, “Apa ndimi kene He?”

Jesu kahandula eti, “Iye unoseba nami mu ndilo ndiye unowondiwonga.

Nkololo we Nhu unowofa sekwa kwakakwagwa ne kukwe. Koga Yee mme wee! Wapalala iwe nlume unowonga Nkololo we Nhu! Kwabe kuyita ha nlume iwoyo akabe asagala azwagwa.”

Ipapo Judasi iye wakan'wonga kati, “N'diyi, apa ndimi kene?” Jesu kahandula eti, “Waleba.”

Bakati batjadla, Jesu katola tjiwunga, katjibokela, katjipemula katjipa badiyiwa babe eti, “Tolani mudle, oku umbili wangu.”

Katola bhepe le nkumbi we n’hhambi, ngono kaumbokela kabapa ilo eti, “Ing'wani mulili mose.

Oku malopa angu e tjibvumano anotebuligwa banji mu kuzwiibhatigwa matjinyo.

Ndomubudza nditi, anditowong'wa kakale kwe ntjelo iwoyu we n’hhambi kuswikila hhuba landinowoung'wa butshwa namwi mu buhe gwa Tate bangu.”

Bakati basinomba lumbo gunokudza Ndzimu, bakabhuda bakayenda ku Dombo le Mitoba.

Ipapo Jesu kababva kati, “Busiku igogu mowopalala mose ne kwangu, ngobe kwakakwagwa kuyi, ‘Ndowobulaya nlisi, ngono mwhizi dze danga dzowopalala.’

Koga ha ndamusiwa ndowoyenda mbeli kwenyu ku Galili.”

Pita kahandula eti, “Kene bose bepalala ne kwenyu, imi andingamusiye.”

Jesu kahandula eti, “Ndolebesa ndoti, mu busiku igo igogu, gukurume lowoti lisanhu likalila, unowondizwilandula katatu.”

Koga Pita kalebeleka eti, “Imi andingamuzwilandule bukulu ndingafa namwi.” Ngono bose bamwe badiyiwa bakalebabo sa ikoko.

Ipapo Jesu kayenda ne badiyiwa babe panhu panodang'wa Getsemane, ngono kati kubali, “Galani ipapa imi nditjayenda apaye kunotembezela.”

Wakatola Pita ne bakololo babili ba Zebhedi kayenda nabo, ngono kangina buyendasi ne dziyidzika kukulu.

Ipapo kati kubali, “Meya yangu ihhele buyendasi kukulu kwandingafa. Salani ipapa mulinde nami.”

Ngono kapindila mbedlana kawila pasi ne buso katembezela eti, “Tate bangu ha kutubuka, bhepe ileli le kudziyidzika ngalindipinde. Nenguba kwakajalo, musiyite kuda kwangu, itani kuda kwenyu.”

Ngono kabgwilila ku badiyiwa babe, ngono kawana bakayizela, ndizo kabhuzwa Pita eti, “Apa mabe musingake mukatubula linda nami awara ing'ompela kene?

Lindani mutembezele, kuti ndizo musingine mu kulikwa. Meya inoda tjose, koga nyama inokong'wa.”

Kayenda gwe bubili katembezela eti, “Tate bangu, ha kusingatubuke kuti bhepe ileli lekudziyidzika lindipinde, ndisaling'wa, kuda kwenyu ngakuhingikale.”

Kati ebuya kakale kabawana bakayizela, ngobe meho abo akabe elema ne whope.

Ngono kabasiya kayenda kakale kanotembezela gwe butatu eleba matama iwo zwawo.

Kubvapo kahha ku badiyiwa babe kati kubali, “Apa mutjakayizela munyaluluka kene? Lingani, lubaka gwasedzela, ngono Nkololo we Nhu unowongegwa mu maboko e batjinyi.

Milikani, ngatiyendeni, ngobe n'wongi wangu wabe pedlo.”

Jesu kati atjalebeleka, Judasi, mmwe we bali gumi lina babili, kaswika. Wakabe ana mbunga nkulu we banhu bakasenga mathumo ne dziswimbo, batumwa ne Baphirisiti bakulu ne bakulu be Bajuta.

N'wongi wakabe abapa tjilakidzo eti, “Iye wandinowoputa ndiye, mumbhate.”

Judasi kayenda pana Jesu tjinyolotjo kati kuunli, “Mabuyani N'diyi!” Ngono kamputa.

Jesu kati kuunli, “Nzwalani, ini uli ipapa?” Ipapo balume bakasedzela bakabhata Jesu, bakansunga.

Mmwe we bakabe bana Jesu kahomola bukanu gugwe ne luboko, katema nlanda we Ntungamili we Baphirisiti kanthubula zebe.

Jesu kati kuunli, “Bgwiliza bukanu gugo mu magalo ago, ngobe bose banohingisa bukanu banowofa ne bukanu.

Autokumbula kuti ndingakumbila kuna tate bangu, tjinyolotjo bakandipa miphatho ye ngwa dze batumwa be kudzimu inopinda gumi lina mibili kene?

Matama e whalo dze Ndzimu angakowohingikala tjini kene anoti, kwakafanila hingikala ndi iyeyi zila.”

Ipapo Jesu kati ku mbunga iwoyu we banhu, “Apa mabhuda se munoyenda ku tjigebeng'a kene, makasenga makanu ne swimbo kuwonditola? Misi yose ndakagala mu Ng'umba ye Ndzimu ndidiya, koga mukasindisunge.

Koga kose ikoku kohingikala kuti ndizo matama akakwagwa ne balebesambeli asiwile pasi.” Ipapo badiyiwa bose bakamfupatila bakatihha.

Ibabo bakabe basunga Jesu bakansa kuna Kaifasi Ntungamili we Baphirisiti kwakabe kwakakubunganila badiyi be nlayo ne bakulu be Bajuta.

Ngono Pita kantobela ali nhambgwana kunoti mu n’ha we Ntungamili we Baphirisiti. Kangina kagala pasi ne balindi kubona tjinowohingikala ku bupelo.

Baphirisiti banolaula ne makulukota wose e Bajuta bakabe behaka butendeki gwe manyepkhwa gungasungisa Jesu kuti abulawe,

koga bakasiguwane, nenguba batendeki be manyepkhwa banjinji bakazha. Gwe bupelo kukahha balume babili,

ngono bakati, “Nlume iwoyu wakati, ‘Ndingakolomola Bugalo gwe Ndzimu abuya agubaka kakale mu mahhuba matatu.’”

Ipapo Ntungamili we Baphirisiti kamilika kati kuna Jesu, “Apa auna dabilo kene? Batendeki ibaba bakatini ne kuko?”

Koga Jesu kanyalala. Ntungamili we Baphirisiti kati kuunli, “Ndokutunisa ne Ndzimu unotjila nditi, Utibudze kene u iye Mesiya, iye Nkololo we Ndzimu.”

Jesu kati, “Waleba. Koga ndomubudza nditi, kubvapo mowobona Nkololo we Nhu ali gele ku luboko gwe ludli gwe Masimba, ehha mu hango ali mu makole e kudzimu.”

Ipapo Ntungamili we Baphirisiti kapalula hazu iye eti, “Watuka Ndzimu! Titjahakilani batendeki bamwe kakale? Bonani, ngwenu mazwiwhila tuka Ndzimu kukwe.

Moipedza tjini?” Bakahandula beti, “Wakafanila fa.”

Ipapo bakampfila mate mu buso, bakanloba. Bamwe bakampkhwaula

beti, “Utibudze iwe Mesiya. Ndiani wakuloba?”

Pita wakabe ali gele mu n’ha, ngono kukahha nlandakadzi kati kuunli, “Nawebo wabe una Jesu we Galili.”

Koga kalandula mbeli kwabo eti, “Anditoziba tjaunoleba ne kwatjo.”

Kati ebhudila kuhhe ku nkoba kabong'wa ne mmwe nlandakadzi, kakale kabva banhu ba ipapo kati, “Nlume iwoyu wabe ana Jesu we Nazareta.”

Kalandula kakale etuna eti, “Anditoziba nlume iwoyu!”

Hule kwe lubaka gufupi, bakabe bali mile ipapo bakayenda kuna Pita ngono bakati kuunli, “Malebeswa tjose u mmwe wabo, ngobe lebeleka kuko kolakidza kujalo!”

Ipapo katangisa kuzwilonga bhiso kakale etukana nabo eti, “Anditoziba nlume iwoyu!” Tjinyolotjo gukurume likalila.

Ipapo Pita kakumbula dama lakabe lalebgwa ndi Jesu eti, “Gukurume lowoti lisanhu likalila unowobe wandizwilandula katatu.” Ndizo kabhudila kuhhe kalila kwazo.