New Testament

Ndimi Paulo, ndina Timoti, tili balanda ba Khirisiti Jesu. Ku bayengemali bose muna Khirisiti Jesu bamu nzi we Filipi ne badiyi ne batiyakoni be gubungano:

Ngoni ne kunyalala kunobva ku Ndzimu Tate bedu na He Jesu Khirisiti ngakube namwi.

Ndoboka Ndzimu wangu misi yose ha ndimukumbula.

Lubaka gumwe ne gumwe gwandinomutembezelela, ndotembezela ne kuhanha,

ndiboka sekwa makabhatana nami mu n’hingo we ndebo mbuya, kubva mu hhuba le kutangisa kowoti ngwenu,

ndina malebeswa e kuti iye wakatangisa n’hingo wakanaka mumuli, unowoupedzisa mu hhuba la Khirisiti Jesu.

Kwakandilulwamila kuzwiwha sa ikoku ne kwenyu mose, ngobe mumu moyo wangu misi yose. Mose makahanganila ngoni dze Ndzimu nami, kose mu busungwa gwangu ne mu kuvikilila ne kusimisa ndebo mbuya.

Ndzimu ntendeki wangu, kuti ndoyemula kumubona mose kwazo ne ludo gwa Khirisiti Jesu.

Ngono ntembezelo wangu whuti, ludo gwenyu guyendilembeli gupamhidzike ne luzibo nenge kuwhisisa ne buhhalo,

kuti ndizo mutubule kuhalula tjakalulwama kupinda zose, ngono mube bakatjenapala musibe ne nlandu mu Hhuba la Khirisiti,

mowowang'wa muna mitjelo ihhele ye ndulamo inohha ndi Jesu Khirisiti kukudza ne kulumbidza Ndzimu.

Ndohaka muziba etji makamu, zwakandihingikalila zwakabhatsha kuandamisa ndebo mbuya.

Ngono nekwa ikoku, babhayani bose pano ne bamwe bose banoziba kuti ndi mu busungwa nekwa Khirisiti.

Bunjinji gwe makamu, bakasimisiwa muna He ne busungwa gwangu, kakale batjibe ne tjilopa kuleba dama le Ndzimu basingahle.

Malebeswa whukuti bamwe banosumikila Khirisiti ne ndandala nenge kukakabadzana, koga bamwe banonsumikila ne mazwiwo akalulwama.

Aba banokuthama ne ludo, ngobe beziba kuti Ndzimu wakandipa n’hingo we kuvikilila ndebo mbuya.

Ibabo bamwe banosumikila Khirisiti ne kuhaka kuzwihingila bali boga kusi ne moyo wakalulwama behaka kundidziyidza kunjinji mu busungwa gwangu.

Apa koti tjimwe kene? Kene Khirisiti unosumikigwa ne zila ipi kene ipi, yakabipa kene ye malebeswa, ngono nekwa ikoko ndohanha. Ee ndowohanha,

ngobe ndoziba kuti ne mitembezelo yenyu nenge lubhatsho gwe Meya ya Jesu Khirisiti, ikoku kowohanduka kukandisunungula.

Sekwa ndinoyemula, kakale ndigalabgwe kuti anditowobhakhwa ne honi mu n’hingo wangu, koga ne kulebeleka ndakasimisamoyo sekwa ndagala ndithama, Khirisiti unowokudziwa mu mbili wangu; kene kuli ne butjilo kene ne lufu.

Ngobe kundili kutjila ndi Khirisiti, kufa imbuzilo.

Koga ha ili kuti kutjila ndiko kuna n’hingo una mbhayilo, ipapo anditoziba kuti ndingahalula kupi.

Ndi pakati kwe mikumbulo mibili, ndoyemula kuthubukana ne butjilo ndikanobe na Khirisiti, ngobe ikoku kobhatsha kwazo.

Koga kube nditjatjila mu nyama kohakika kupindisa, kuti mubhatshike.

Ndogalamoyo ndi ikoku, ndoziba kuti ndowotjila, ngono ayendilambeli namwi mose, ndithamila ikoku kuyendilambeli kwenyu ne kuhanha mu kugalamoyo,

koyita kuti mundili mube ne tjamungazwikudza nditjo muna Khirisiti Jesu nekwe kuhha kwangu kumuli kakale.

Tjikulu whuti, zila ye butjilo gwenyu ngaiyendilane ne ndebo mbuya ya Khirisiti, kuti ndizo kene ndihha kuwomubona kene ndisipo, ndiwhe ne kwenyu kuti makabhata makasimisa ne meya ing'ompela ne nkumbulo nng'ompela mugwisila kugalamoyo kwe ndebo mbuya,

musingahle tjimwe mu zwita zwenyu, woku tjilakidzo kubali tje kulobesiwa kwabo, koga tje jidzo lenyu, linobva ku Ndzimu.

Ngobe makakupiwa kuti, nekwa Khirisiti musigalemoyo muunli koga, mudziyilebo ne kukwe,

muli mu ngwa iyozwayo yamakabona, koga ngwenu muwha kuyi ndi muili.