New Testament

Eyi i zumbunulo ya Jesu Khirisiti yaakapiwa ne Ndzimu kulakidza balanda bawo tjinowohingikala tjinyolotjo. Jesu kayizibisa ne tuma ntumwa uwe we kudzimu kuyizibisa nlanda uwe Johani.

Johani kapa butendeki nekwe dama le Ndzimu nekwe tjakahingwa ndi Jesu Khirisiti, kaleba tjimwe ne tjimwe tjaakabona.

Unamhahhambuya unobalila pehhugwi matama e bulebesambeli igogu, ne banowha matama iyawo bana mhahhambuya ne banolondolodza tjakakwagwa muguli ngobe lubaka gwasedzela.

Ndimi Johani, ndokwalila makubungano ali kutendeka mu ntunhu we Ezhiya: Ngoni ngadzibe namwi ne kunyalala kunobva ku Ndzimu iwo wakabepo, nangwenu uyapo, kakale utjawohha, nene kunobva ku meya ili kutendeka imbeli kwe tjigalo tje buhe gwe Ndzimu,

ne kuna Jesu Khirisiti iye ntendeki unogalikabgwe, mbano muna bakamusiwa mu bafi, kakale ali mbusi wa bohe be hango. Kuunli iye unotida, kakale akatisunungula mu zwibi zwedu ne malopa awe,

katithama kuti tibe buhe ne Baphirisiti be Ndzimu uwe, ibo tate babe. Kuna Jesu Khirisiti ngakube ne gudzo nenge simba ne kusingapele kose. Ngakujalo.

Bonani, unohha ne makole, ngono meho wose anowombona, kose na ibabo bakambhaya ne njudzi dzose dze hango dzowolila ne kukwe. Ngakujalo.

“Ndimi bhalule kakale bhelelo,” kolebeleka He Ndzimu, iwo uyapo, kakale wakabe yapo, kakale utjawohha, iwo Masimbawose.

Ndimi Johani gamu lenyu, imi ndakahanganyila namwi muna Jesu kudziyidziwa nenge buhe ne moyonlefu mu kudzikitadza, ndakabe ndili mu tjigwizi tje Patimosi nekwe dama le Ndzimu nenge butendeki gwa Jesu.

Ndakabe mu Meya ne hhuba la He, ngono awha whi gulu linonga nsindo we lunyanga gunolidziwa hule kwangu,

liti, “Kwala mu lukwalo tjaunobona, ngono ugutumilile ku makubungano ali kutendeka, mu nzi we Efeso newe Simirina newe Pegamo newe Tiyatira newe Sadisi newe Filadelifiya newe Laodikeya.”

Ipapo atendebuka alinga hule kuti ndibone unolebeleka nami, ngono abona zwigadziko zwe mavone ali kutendeka zwakathamiwa ne golide,

ngono pakati kwazo kwakabe kuna mmwe unonga Nkololo we Nhu, akaambala hazu ndefu, akazwisunga pa fuba ne mmwandabula we golide.

N’holo uwe ne mavudzi awe akabe ali matjena se lungudze, ali matjena enga makaa e vula, ngono meho awe enga mpfuto we moto,

makumbo awe epenya se tshipi inoyi bhurasi yakapholitjiwa, yakapisiwa mu vutho ikakuyungiwa, ngono whi lile lakabe linga nsindo we vula njinji.

Wakabe akabhata nyenyedzi dzili kutendeka mu luboko gugwe gwe ludli, ngono mu nlomo uwe kukabhuda bukanu gunopiza guna mahali mabili. Buso gugwe gwakabe gupenya se hhuba linopenya ne masimba wose.

Ndakati ndimbona awila pasi mbeli kwe makumbo awe ndinga ndafa, wakabiga luboko gugwe gwe ludli pehhugwi kwangu, ebe eti, “Usihle, ndimi we kutanga kakale we bupelo.

Ndimi unotjila, ndakabe ndafa, ngono bona ndotjila ne kusingapele kose. Ndina simba pehhugwi kwe lufu ne bugalo gwe bafi.

Ndizo kwala zwinhu zwaunobona, zwinhu zose zwiyapo sangwenu ne zwinhu zwinowohingikala hule kwa ipapa.

Akuli nekwe masazibgwe e nyenyedzi dzili kutendeka dzawabona mu luboko gwangu gwe ludli ne zwigadziko zwe mavone zwe golide zwili kutendeka, nyenyedzi idzedzi dzili kutendeka batumwa be kudzimu mu makubungano ali kutendeka. Zwigadziko zwe mavone zwe golide zwili kutendeka makubungano ali kutendeka.”