New Testament

Hule kwa ikoku ndakabona mmwe ntumwa we kudzimu edeluka ebva kudzimu ana masimba makulu, ngono tjedza tjitje tjakapenyesa hango yose.

Kalebeleka ne whi lina masimba eti, “Wawa, wawa nzi nkulu Bhabhiloni! Wabe bugalo gwe meya mibi, yabe makotokelo e meya mmwe ne mmwe wakayipa. Nyunyi dzose mbimbi dzinohemeka dzokotokela muunli.

Ngoti zwitjaba zose zwakang'wa nkumbi we hambgwa ye bufukula gugwe. Bohe bakulu be hango bakathama bupombgwe naye, balume banohaba be hango bakafumiswa ne nyota iye ye kube ne tjimwe ne tjimwe isingalaugwe.”

Ipapo awha limwe whi libva kudzimu liti, “Bhudani muunli banhu bangu, musitongo bva muhanganyila zwibi naye, mungabva nshanganyila hamu naye.

Ngoti zwibi zwizwe zwakabutitikwa zwikanoswika kudzimu, ndizo Ndzimu auzokangang'wa matjinyo awe.

Munthamile koga sekwa akamuthamila. Muunlipe kabili muna kose kwaakathama. Muhhadze tjing'wilo tjitje ne tjing'o tjakabila kabili kupinda tjing'o tjaakamuthamila.

Mun’whise zogwadza ne buyendasi gunolizana kuzwikudza kukwe nenge dla eng'wa fumwa yaakazwipa. Se ezwibva mu moyo uwe eti, ‘Ndigele ipapa ndili Hekadzi! Ate ndili tjilikadzi, tjililo andingatjibone.’

Ndizo hamu dzidze dzowohha mu hhuba ling'ompela, Lufu ne tjililo ne hhala. Ngono unowopisiwa ne moto, ngoti He Ndzimu una masimba unowonsumikilisa.”

Bohe bakulu be hango bakahinga bupombgwe naye behanganyila dla ne ng'wa, banowolila bakakuwa ne kukwe ha bebona busi gwe tswha kukwe.

Banowomila kule kule, behlisiwa ne whisiwa zogwadza kukwe, ngono banowoti, “Yee mme wee! Yee mme wee! Wapalala iwe nzi nkulu, usin’homa Bhabhiloni! Wasumikilisiwa mu awara i nng'ompela.”

Batengesi be thundu be hango banowonlilila ngobe akutjina unowotenga thundu dzabo kakale.

Thundu ye golide ne siliva ne maseka akanaka ne mabgwe ne ndalama ne matyila akanaka ne jila le mbala we buhaba gwakabondelela ne jila linotedzemuka ne jila haba le themba ipehhugwi ne zwihholo ne zwinonuwhilila zwinozipa milenje lenje ye whuni dze themba ipehhugwi ne nyanga dze hhowu ne bhurasi ne dzitshipi ne mabgwe matjena anopenya;

ne sinamoni ne motsha ne mafuta anonuwhilila zwinozipa ne nkumbi ne mafuta e ntjelo we ntoba, bgwisa gwe tjiwunga, mbewu, ng'ombe, mwhizi, mbizi, koloyi, balanda kubva kuti banhu.

Zwinhu zose zwakalulwama zwawakabe uyemula kube nazo zwakulahikila, ngono nenge fumwa iyo yose ne bubuya gugo kwayenda, ngono autowofa wazwibona kakale.

Batengesi bakawana fumwa ngotenesa muunli banowomila kule kule, ngoti banohla whisiwa zogwadza kukwe. Banowolila bekuwila pehhugwi.

Ngono banoti “Yee mme wee! Yee mme wee! Wapalala nzi iwoyu nkulu wakabe wakaambala ntjeka wakanaka ne jila le mbala we buhaba gwakabondelela ne jila haba le themba ipehhugwi, ngono ezwinakisa ne golide ne mabgwe anopenya ne ndalama!

Ngono walahikigwa ne fumwa iye yose mu awara i nng'ompela koga.” Bayendisi bose be zwikepe ne balauli babo ne batenesi banoyenda ne zwikepe, na ibabo banoseyenya ne zwikepe mu gungwa bakamila kule kule,

ngono bakalila ha bebona busi gwe tswha kukwe beti, “Ndiupi nzi nkulu wakatongonga iwoyu nzi nkulu kene?”

Bakadila whuluba mu miholo yabo, bakalila, bakangina mu buyendasi beti, “Yee mme wee! Yee mme wee! Wapalala nzi nkulu! Iwo wakati bose bana zwikepe zwinotendeleka mu gungwa bakazwifumisa ne fumwa yawo. Mu awara i nng'ompela walahikigwa ne tjimwe ne tjimwe.”

Hanhani ne kwawo ba kudzimu. Hanhani bayengemali ne batumwa ba Jesu ne balebesambeli, ngoti Ndzimu wamusumikilisila iye.

Ngono hule ntumwa we kudzimu, una masimba kanunga bgwe linonga gwiyo gulu, ngono kaliposela mu gungwa eti, “Eyi ndiyo zila inowoti nzi nkulu una masimba Bhabhiloni, ukaposegwa pasi ne masimba, ngono autowofa wabong'wa kakale.

Zwitinkani ne kumba kwe banhu ne balidzi be nyele ne lunyanga, akutjowobuya kukawhika mukuli kakale, akuna n’hingi upi kene upi utjowofa abong'wa mukuli kakale, ngono ne hhoba ye gwiyo aitjowopamha ikawhika kakale.

Akutjowobuya kukaboneka kakale tjedza tje luvone mukati kuko. Akutjowobuya kukawhika kakale mawhi e balongo ne e baloboli mukuli. Batengesi babo be thundu bakabe bali ibo bakulu mu hango yose, ngono ne butjenjebvu gwenyu gwe malipa, makatjebela zwitjaba zose zwe hango.”

Mu Bhabhiloni kwakawanika malopa e balebesambeli ne e bayenemali ne e banhu bose bakabulawa mu hango.